Ekonomi: 1.470 kompani, 7.000 të punësuar
Sektori i mobilierisë në Shqipëri
1.470 kompani punojnë në fushën e prodhimit të drurit në Shqipëri, të cilat kanë të punësuar sot rreth 7.000 vetë". Kështu deklaroi ministrja e Zhvillimit Ekonomik, Turizmit, Tregtisë dhe Sipërmarrjes, znj. Milva Ekonomi, teksa zhvilloi një vizitë në Panairin Ndërkombëtar të Mobileve "Shqipëria 2017", i cili hapi dyert në Pallatin e Kongreseve më 11 mars dhe mbyllet sot më 14 mars. Në këtë panair, të organizuar nga "Albexpo Group" në bashkëpunim me Shoqatën e Mobilierëve Prodhues të Shqipërisë ( AWPA) të Kosovës dhe shoqatave simotra të rajonit, ekspozojnë produktet dhe teknologjitë e tyre në sektorin e mobilierisë dhe prodhimit të drurit kompani vendase dhe të huaja. Ministrja Ekonomi u takua me gjithë prodhuesit në panair, dëgjoi për arritjet e tyre dhe i inkurajoi për të vazhduar më tej iniciativat e tyre për të përqafuar teknologjinë dhe për të vazhduar traditën shqiptare në përpunimin e drurit si dhe për të zgjeruar eksportet. "Ky është një nga panairet më serioze të sipërmarrjes prodhuese në vendin tonë. Të dhënat e kësaj industrie tregojnë se janë rreth 1.470 sipërmarrje prodhuese që punojnë në fushën e prodhimit të drurit. Është një biznes shumë serioz, i cili ka përcjellë punën dhe trashëgiminë nga administratori i parë tek i dyti, duke transferuar informacionin dhe teknologjinë", - tha ministrja Ekonomi. Ajo gjithashtu u shpreh shumë e kënaqur që shumica e këtyre prodhuesve eksportojnë tashmë në vende të ndryshme të botës. "Në tri vitet e fundit, eksporti mesatar vjetor i produkteve me bazë druri ka arritur në 12 milionë euro në vit", - tha ministrja Ekonomi, e cila shtoi se aktualisht në këtë sektor punojnë rreth 7.000 punonjës, por sektori ka shumë kapacitete për të thithur më shumë punonjës. Ajo shprehu bindjen se, pavarësisht vështirësive, prodhuesit e kësaj industrie ia kanë dalë që falë iniciativave dhe punës së tyre të rrisin prodhimin dhe tregtinë me vendet e rajonit.