Plotësimi i formularëve, Dobi: Maturantët informohen për çdo hap që duhet të ndjekin
Drejtoresha: Bëjmë konsultime çdo ditë të javës
Lidhur
me procesin e in formimit të maturës shtetërore, për "Gazetën Shqiptare" ka folur drejtoresha e gjimnazit "Sami Frashëri", Teuta Dobi. Sipas drejtoreshës informimi i maturantëve fillon që në janar ndërsa bëhet dhe konsultime në çdo ditë të javës nga mësuesit përkatës. "Përgatitjet për maturën shtetërore fillojnë që në janar. Këtë vit shkollor, me 29 dhjetor ka dalë dhe udhëzimi i ministres për maturën, pastaj ka dalë rregullorja e maturës shtetërore dhe këto ditë po bëhemi gati për plotësimin e Formularit A1 dhe A1Z, që ka dalë disa më parë në faqen e ministrisë dhe ka informacionet e duhura për maturantët. Departamentet e letërsisë, matematikës dhe të anglishtes kanë konsultime gjithë javën. Për shembull në lëndën e matematikës kemi 3 mësues që japin mësim dhe bëjnë konsultime 2 ditë të javës secili, pra 6 ditë të javës. Këto mësues kanë dërguar në drejtori programin se çfarë do bëjnë në secilën orë të konsultimeve" u shpreh drejtoresha. Për sa i përket plotësimit të formularit A1 dhe A1Z drejtoresha Dobi, tha: "Për plotësimin e formularëve ne kemi një laborator me internet dhe në çdo shkollë është administratori që mund të jetë çdo mësues i informatikës, i matematikës apo dhe drejtori. Në shkollën tonë ne kemi kën- din e maturantit në çdo klasë, ku është vënë udhëzimi, rregullorja, të gjitha kriteret e pranimit në universitet, që është e vendosur në korridor për të gjithë, apo dhe orari i konsultimeve". Sipas drejtoreshës lënda që aplikohet më shumë në konsultime është lënda e matematikës. Gjithashtu, Dobi u shpreh se bëhet edhe informimi i prindërve dhe shpjegoi si bëhet informimi i maturantëve. "Për informimin e prindërve ne kemi një ambient ku bëhen dhe mbledhjet e shkollës dhe aty bëhet dhe këshillimi i maturantëve. Çdo të hënë kemi një 10 minutash për informimin e çdo të reje që vjen lidhur me maturën, si orë edukative. Informacionet paraprake u dërgohen mësuesve me email dhe pastaj iu komunikohet nxënësve. Të gjithë maturantët i kanë marrë të gjithë udhëzimet dhe mësuesit mundohen të jenë të kujdesshëm që të informojnë siç duhet maturantët. Ne kemi pasur dhe ditët e këshillimit të karrierës ku secili universitet shtetëror dhe privat vjen në shkollë apo me disa shkolla njëherësh dhe shpalosin programet e tyre. Procesi është i njëjtë si vjet, dhe nuk ka ndryshime" tha së fundi drejtoresha Dobi.