Mustafaj: Zgjedhjet pa opozitën thellojnë krizën
Publicisti
Besnik Mustafaj shprehu dje në "News24" bindjen se, nëse zgjedhjet e 18 qershorit zhvillohen pa opozitën, kriza në vend do të thellohet. Mustafaj u shpreh skeptik për vazhdimin e protestës nga ana e opozitës, duke thënë se duhet të matet se sa kjo kauzë është përqafuar nga opinioni publik, ndërsa për kryeministrin Rama tha se po mban një qëndrim kokëfortë ndaj argumenteve të opozitës. "Nuk shoh që opozita të ndryshojë qëndrim, po ashtu as nga kryeministri, që tha se kriza e PD- së nuk duhet parë si krizë e vendit. Ne gjendemi përsëri në thelb të krizës që kemi qenë, vetëm baza e së cilës thellohet. Do shohim se si do bëhen zgjedhjet nëse Rama futet i vetëm në garë. Do shohim si do administrohen zgjedhjet pa prezencën e partive të opozitës dhe do shohim si do sillet LSI- ja. Ndërsa për Lulzim Bashën, jam i mendimit që nuk është e mjaftueshme që të pëlqehesh vetëm nga militantët e partisë tënde. Lidershipi duhet të shkojë përtej, ne nuk kemi matës të opinionit publik. Duhet kuptuar sa është përqafuar kauza e opozitës nga opinioni publik. PD- ja ka dhënë të gjitha argumentet pse nuk do shkojë në zgjedhje. Rama ka treguar se nuk lëshon pe për të dëgjuar argumentet e opozitës. Rama ka një qëndrim kokëfortë. Nuk analizon argumentet e opozitës. Ai është i qartë në kokëfortësinë e tij. Kemi parë një kokëfortësi të ngjashme në vitin 1996, kur parlamenti, nga maji deri kur u krijua qeveria e Finos, mbeti pa opozitën. Çfarë reformash mund të ndërmarrë një mazhorancë pa opozitën", - tha ai.