Rama: President apo presidente, do jetë figurë që ka mirëkuptim
Kryeministri, kafe me pensionistët: Vetingun nuk do e lëmë në mëshirë të çadrës "PD do ta marrë përgjigjen më 18 qershor"
Kryeministri Edi Rama deklaroi dje, se për emrin e presidentit apo presidentes së re të vendit, do të synohet një mirëkuptim me të gjitha palët, pavarësisht se mazhoranca i ka votat. Ai e nisi dje ditën duke pirë kafe me një grup gjyshërish në lulishten e një prej këndeve të lojërave të rilindur të Tiranës. Në një bisedë pa protokoll, pensionistët morën në pyetje kryeministrin për zhvillime të ditës.
Këmbënguljes së tyre se përse nuk kryhet vetingu, kryeministri i siguroi se vetingu do të bëhet, pavarësisht se opozita po shfrytëzon kompromisin e ofruar gjatë hartimit të reformës, për ta bllokuar atë. "Vetingu duhet të mbarojë. U bënë thirrje për aplikime. Sipas Kushtetueses, është ONM- ja ajo që duhet të verifikojë çdo aplikim dhe ka tri lista. Iu është lënë kohë aplikantëve të plotësojnë dokumentet që iu mungojnë. Pastaj do vijnë në parlament. Ne i kemi dhënë opozitës një kompromis, që po e përdor për të bllokuar reformën. Ata kërkuan 50% me 50% të komisioneve. Komisioni i parë është 12 veta dhe komisioni i dytë 6 veta. Nëse ata nuk vijnë, anëtarët e komisioneve nuk zgjidhen. Kjo ka qenë pika që ne ia dhamë për kompromis dhe që po e përdorin për të bllokuar", - shpjegoi Rama. "Por, ne nuk e lëmë këtë gjë në mëshirë të çadrës. Se si dhe se qysh, hap pas hapi do e zgjidhim. Por nuk diskutohet që ata nuk kanë për ta bllokuar këtë. Nëse do këmbëngulin, në 18 qershor kanë për të marrë një përgjigje. Ata e dinë këtë gjë, sepse, siç bëjmë ne sondazhe ku janë 90% e popullit që duan drejtësi dhe veting, edhe ata e dinë", - shtoi kryeministri. "Opozita, - tha kryeministri, - po tenton të spostojë krizën e saj në jetën publike të qytetit". "A i ka mazhoranca votat për të zgjedhur Presidentin e Republikës?" - ishte pyetja e një të moshuari. Pasi shpjegoi procedurën parlamentare të zgjedhjes së kreut të shtetit, kryeministri nënvizoi se, "ndonëse mazhoranca i ka votat për ta zgjedhur që në raundin e parë, do tentojmë që presidenti apo presidentja të jetë një figurë që të ketë një mirëkuptim dhe mbështetje". "Kemi bërë shumë, ka shumë akoma për t'u bërë, por rëndësi ka të mos humbim kohë për t'u kthyer mbrapsht. Përtej partive, është që të bëjmë gjëra të mira. Ja Tirana, për shembull. Të dy ata që kanë çadrën e kishin Tiranën. Njëri te zyra ime, tjetri te zyra e lali Erit. Çfarë bënë?!" - u shpreh më tej Rama, duke premtuar se rritja ekonomike do të shkojë 5%. Ndërkohë, pasdite ai ishte në Vlorë, me për- fituesit e Paktit të Mirëqenies Sociale. Edhe atje, Rama vuri theksin te reforma në drejtësi. "Të gjitha këto reforma do të fillojnë të japin në çdo hap e më shumë rezultate, por janë të kërcënuara në suksesin e tyre të plotë nëse ne nuk zbatojmë reformën në drejtësi, nëse ne nuk çlirojmë drejtësinë nga kthetrat e gjykatësve dhe prokurorëve të korruptuar dhe, nënkupto këtu edhe nga kthetrat e politikanëve të korruptuar, që do të thotë që për ne është themelore që të fillojë zbatimin e reformës në drejtësi përmes vetingut", - tha Rama.