Basha: Ekipi fitues i Trump mbështet PD në zgjedhje
Kreu i PD kthehet nga Uashingtoni dhe jep 3 mesazhe, mbledh sot grupin parlamentar për strategjinë e protestës "Beteja në fazën vendimtare, zgjedhje të lira pa Edi Ramën"
Kryetari i Partisë Demokratike, Lul zim Basha, i sapokthyer nga Shtetet e Bashkuara të Amerikës, deklaroi dje 3 mesazhet që kishte marrë gjatë qëndrimit atje. Ndërkohë Basha do të mbledhë sot rreth orës 19: 00 grupin parlamentar për të diskutuar strategjinë e protestës. Kreu i opozitës u shpreh i bindur në fitoren e aksionit politik të PD- së dhe aleatëve për qeveri teknike e zgjedhje të lira pa Edi Ramën kryeministër. Në çadrën e vendosur në bulevardin kryesor të Tiranës, Basha bisedoi me juristë dhe studentë për raportin e DASH për situatën e drogës në Shqipëri. "Përgëzimet vijnë drejtpërdrejt, jo për mua, por për gjithsecilin prej jush që jeni në këtë betejë epike, historike, që do të ketë vetëm një përfundim, fitoren tuaj, fitoren e Shqipërisë, fitoren e demokracisë", - u tha Basha mbështetësve në çadër. "Mesazhi i dytë, i sinqertë, që buron drejtpërdrejt, jo nga kalkulimet politike të aleatëve tanë strategjikë, por nga bindja e tyre më e thellë, e këtij brezi drejtuesish dhe politikanësh në Kongres, në Senat, në Shtëpinë e Bardhë dhe dhjetëra brezave para tyre, që e dinë fare mirë kuptimin e kësaj lufte në historinë e tyre, pra mesazhi i dytë, që ua kam premtuar bashkëbiseduesve të mi, politi-
kanëve më të lartë të Shteteve të Bashkuara të Amerikës që takova në Uashington se do ta përcjell besnikërisht këtu në këtë çadër, është: falënderimi për
ju! Jo thjesht si njerëz që ngriheni për të drejtën tuaj për zgjedhje të lira e të ndershme, por si një armatë e vërtetë që luftoni për liri këtu në këtë front, ku ajo është e kërcënuar nga krimi i organizuar, nga droga, nga paratë e pista që nesër mund të financojnë terrorizmin, dhe e kërcënuar nga nomenklatura e ish- komunistëve anti- amerikanë dhe stalinistë të Tiranës", - vijoi Basha. "Mesazhi i tretë, është mesazhi i mbështetjes totale të miqve tanë! Mbështetjes politike, mbështetjes parimore dhe morale dhe, po, mbështetjes së gjithanshme për Partinë Demokratike të Shqipërisë, nga ekipi fitues i presidentit Trump, jo vetëm për këtë betejë, por edhe për zgjedhjet që do të vijnë, për zgjedhje të lira e të ndershme, me një qeveri teknike. Partia Demokratike dhe opozita shqiptare do të kenë ekspertizën dhe ndihmën e ekipit fitues në zgjedhjet e Shteteve të Bashkuara të Amerikës", - tha më tej, Basha. "Beteja jonë ka hyrë në një fazë vendimtare. Në fazën kur vendosmëria, kuraja dhe besimi në kauzën e zgjedhjeve të lira dhe të ndershme do të përcaktojnë të vetmin përfundim të kësaj beteje. Ka një dhe vetëm një përfundim. Largimin e Edi Ramës, një qeveri teknike që do të garantojë zgjedhje të lira dhe të ndershme. Me forcën tuaj, me bekimin e Zotit dhe me ndihmën e miqve tanë amerikanë, ne patjetër do t'ia dalim", - theksoi kreu i PD- së.