Barnat e rimbursueshme, shtohen 30 ilaçe në skemë
Nga operacionet në zemër te dializa, shërbimet që mbulohen nga Fondi Pritet vendimi i qeverisë, në fuqi më 1 maj 2017
Lista e re e barnave të rimbursueshme është pasuruar me 30 barna të reja. Këtë vit u është dhënë rëndësi sëmundjeve me përhapje të gjerë në popullatë, sikurse janë ato të zemrës dhe veshkave. Një vëmendje e veçantë u është kushtuar të sëmurëve me tumor, për të cilët janë shtuar në listën e rimbursimit barna që shkurtojnë kohën e hospitalizimit të tyre. Lista e re e barnave me rimbursim mbulon edhe një kategori shumë të ndjeshme, por që më herët ka qenë pak e përfaqësuar në listë, sikurse është ajo e fëmijëve. Vendimi për zgjerimin e listës së barnave të rimbursueshme u mor në mbledhjen e Këshillit Administrativ të Fondit dhe pritet të miratohet në Këshillin e Ministrave, ndërkohë që lista pritet të hyjë në fuqi më 1 maj 2017 dhe do të mbulohet nga FSDKSH- ja.
PAKETAT SHËNDETËSORE
Me vendim të Këshillit Administrativ të Fondit, janë zgjeruar dhe përmirësuar të gjitha paketat shëndetësore që mbulohen nga sigurimet shëndetësore si në spitalet publike ashtu edhe ato private. Kështu, pacientët që vuajnë nga dializa, do të përfitojnë dy paketa të reja, atë të fistulës dhe graftit, të cilat do të financohen plotësisht nga Fondi si në shërbimin publik ashtu edhe në atë privat. Gjithashtu janë shtuar disa ekzaminime të reja në paketën e dializës, në mënyrë që shërbimi i ofruar në paketë të jetë i plotë dhe tërësisht në sinkron me protokollet europiane të
këtij shërbimi. Ndryshime të rëndësishme kanë pësuar edhe paketat e kardi-
ologjisë dhe kardiokirurgjisë. Përpos interventit, nga dy ditë qëndrim në terapi intensive të parashikuar në paketat e mëparshme, tashmë janë tetë ditë qëndrim në terapi intensive për interventet e kardiokirurgjisë, që do të mbulohen financiarisht nga Fondi, si në shërbimin publik, ashtu edhe atë privat. Gjithashtu, për të gjashta paketat që përfshihen brenda këtyre dy shërbimeve, janë shtuar ekzaminime të tjera, duke ofruar kështu një shërbim të plotë dhe cilësor për pacientët. Një ndër paketat e reja që u shtua nga Fondi është edhe ajo e implantit koklear për fëmijët me probleme dëgjimi.