Franca nderon Ramën me titullin "Komandat i Legjionit të Nderit"
Presidenti Hollande, dekoratë surprizë: Kryeministër i madh shqiptar e artist i madh francez Edi Rama, i pari kryeministër shqiptar që merr këtë medalje që në vitet ' 30
Kryeministri Edi Rama u nderua dje nga presidenti francez, Fransua Hollande me dekoratën e lartë të "Komandantit të Urdhrit të Legjionit të Nderit". Ky dekorim krejt surprizë u krye jashtë kushteve normale të reciprocitetit, gjë shumë e rrallë në protokollin e Presidencës Franceze, që në rastin e figurave shtetërore akordohet vetëm si njohje meritash të veçanta. Pikërisht për meritat e posaçme në forcimin e marrëdhënieve franko- shqiptare dhe politikën rajonale të Edi Ramës, si edhe për një inkurajim personal për kryeministrin shqiptar në dinamikën euro- integruese të Shqipërisë e në drejtimin e duhur të nisur 4 vite më parë, Presidenti i Francës ka vendosur t'i akordojë shefit të ekzekutivit shqiptar titullin e lartë. Kryeministri Edi Rama mban tashmë të njëjtën gradë sipërore në "Legjionin e Nderit" si shkrimtari Ismail Kadare. Edi Rama është i pari kryeministër shqiptar që nderohet me këtë dekoratë që nga vitet ' 30 dhe i vetmi që dekorohet jashtë kushteve të reciprocitetit, me iniciativë të vetë Presidentit francez. E njëjta praktikë jo reciprociteti u ndoq para pak muajsh edhe për Sekretarin e Shtetit, John Kerry, të cilit iu akordua i njëjti titull i lartë nga Presidenti i Republikës së Francës. Dekorata e lartë iu dorëzua kryeministrit Rama gjatë një ceremonie nga homologu i tij francez, Bernard Cazeneuve. "Presidenti Hollande është në një vizitë zyrtare në Indonezi, por pak më parë pata një bisedë telefonike me të dhe me tha t'ju transmetoj se është një krenari e madhe
për të që të dekorojë sot një kryeministër të madh shqiptar dhe një artist të madh francez", tha dje kryeministri francez. Në fjalën që mbajti gjatë ceremonisë, kryeministri Cazeneuve u shpreh ndër të tjera: "Çdokujt këtu i kujtohet prania juaj, gjatë manifestimit të 11 janarit
2015, në krah të popullit francez, duke valëvitur, në homazh të karikaturistëve të vrarë disa ditë më parë të ' Charlie Hebdo"- së, lapsat tuaj me ngjyrën blu, të bardhë e të kuqe. Përmes këtij simboli, ju shprehnit si prirjen tuaj të dyfishtë prej artisti dhe politikani të an- gazhuar, ashtu edhe marrëdhënien vetjake që ju lidh me vendin, me gjuhën dhe me kulturën tone". Duke e cilësuar një mik të Francës, kryeministri tha për Ramën se, "edhe Franca ju është mirënjohëse për rolin aktiv që ju luani në favor të paqes dhe bashkëpunimit në rajonin e Ballkanit. Ju jeni i pari shef i Qeverisë shqiptare që e keni angazhuar me kurajë vendin tuaj në rrugën e pajtimit me Serbinë dhe sidomos ia keni dalë, në marrëveshje me homologun tuaj serb, të ngrini një Zyrë Rajonale të Rinisë që bashkon gjashtë vendet e Ballkanit Perëndimor. Dëshiroj t'ju përgëzoj për këtë nismë të bukur, themeluar mbi modelin e Zyrës franko- gjermane të Rinisë, që kishin krijuar në kohën e tyre Gjenerali De Gaulle dhe Kancelari Adenauer", tha kryeministri francez. "Duke ju pranuar sot në gjirin e ' Urdhrit Kombëtar të Legjionit të Nderit', Republika i bën kësisoj homazh një burri shteti, një miku të madh të Francës dhe një europiani të bindur, që punon në mënyrë të palodhur për t'i dhënë Shqipërisë vendin që i takon në gjirin e Europës, ashtu siç edhe ne e dëshirojmë, të fortë, të begatë dhe paqësore", u shpreh Cazeneuve. Ndërsa kryeministri Rama, i cili siç tha, e ka marrë veten me vështirësi nga kjo surprizë u shpreh: "Ju falënderoj me gjithë zemër juve dhe gjithashtu edhe zotin President. Nuk e di nëse e meritoj, por është pa dyshim një nder i jashtëzakonshëm për dikë që mbërriti në Francë si një artist, i cili nuk e kishte menduar kurrë se një ditë do të mbërrinte në sallonet e Francës së politikanëve dhe njerëzve të shquar. Dhe marrja e kësaj medaljeje është vërtet një ëndërr. Një ëndërr, në fakt, që ende nuk e kisha parë".