Zv. sekretari amerikan: Shqipëria të mbajë zgjedhjet në 18 qershor
Zyrtari i lartë i SHBA: Opozita e qeveria të ulen në dialog
sekre tari amerikan i Shtetit, Hoyt Brian Yee, i cili po zhvillon një vizitë në Prishtinë foli dje edhe për zgjedhjet në Shqipëri. Gjatë një interviste Radio Televizionin e Kosovës, zyrtari i lartë amerikan deklaroi: "Shqipëria duhet që t'i mbajë zgjedhjet e saj në kohën e duhur, më 18 qershor". Zv. ndihmës sekretari amerikan i Shtetit ka nxitur opozitën dhe të gjitha partitë e tjera që të marrin pjesë në zgjedhje dhe të mos i bllokojnë ato. "Dhe nëse ka probleme, ne mendojmë se opozita dhe qeveria duhet të ulen në dialog dhe t'i zgjidhin, në mënyrë që zgjedhjet të jenë të lira e të ndershme. Kur të vijë koha dhe për këtë ka datë sipas ligjit se kur duhet të mbahen zgjedhjet, ne shpresojmë se edhe në Kosovë zgjedh- jet do të mbahen në mënyrë të lirë dhe të drejtë, jo si shteg i ikjes dhe jo si mënyrë për t'i ikur përgjegjësisë", vijoi Yee. Pak ditë më parë, ambasada amerikane në Tiranë pati një reagim në lidhje me deklaratat e kreut të opozitës, Lulzim Basha, i cili pas kthimit nga SHBA deklaroi se kishte marrë mbështetjen e ekipit zyrtar të presidentit Trump. Sipas ambasadës, SHBA nuk mbështet bojkotin e Kuvendit, pasi një lëvizje e tillë politike nuk favorizon ecurinë e reformave, kryesisht të Reformës në Drejtësi dhe zbatimin e vetingut dhe procesin e integrimit të vendit në BE. "Qeveria e SHBA mbështet zgjedhje të lira dhe të ndershme, dekriminalizimin dhe luftën kundër narkotikëve, por këto çështje nuk duhet të përdoren si shfajësime për të bojkotuar Parlamentin, për të bllokuar zgjedhjet apo për të vonuar zbatimin e reformës së gjyqësorit. Nxisim dialogun midis qeverisë dhe opozitës për t'i zgjidhur këto", u shpreh ambasada pak ditë më parë.