Dekriminalizimi, Basha: Zgjidhja, qeveria teknike
Kreu i PD- së informon PPE në Maltë: Qeveria po përgatitet të manipulojë zgjedhjet Mbështetja e vendit anëtar të BE: Jemi me opozitën
Kreu i opozitës shqiptare, Lulzim Basha nformoi dje PPE- në se qeveria e majtë në Shqipëri po përgatitet të manipulojë zgjedhjet parlamentare të 18 qershorit. Por, para liderëve të së djathtës evropiane të mbledhur në Maltë për samitin e PEE- së, z. Basha bëri të qartë se opozita nuk tërhiqet nga beteja për zgjedhje të lira. Sipas tij, vetëm qeveria teknike garanton proces të ndershëm elektoral. "Ne qëndrojmë para dy zgjidhjeve, të injorojmë dhe të mbulojmë këtë realitet të tmerrshëm, ose të çohemi e të luftojmë për vlerat thelbësore të demokracisë dhe shtetit ligjor. Ne e kemi bërë zgjedhjen tonë. Në 18 shkurt shqiptarët e bënë zgjedhjen e tyre, duke u bashkuar në protestën më të madhe që është zhvilluar në Shqipëri pas rënies së regjimit komunist. Sot është dita e 40 që protesta vazhdon, 24 orë në ditë. Beteja jonë për zgjedhje të lira e të ndershme kërkon shkëputjen e lidhjeve mes qeverisë dhe krimit të organizuar. Prandaj vetëm një qeveri teknike mund të përmbushë kushtet për zgjedhje të lira e të ndershme, duke zbatuar ligjin e dekriminalizimit dhe duke luftuar kultivimin e trafikimin e drogës", deklaroi kreu i PD- së. Z. Basha akuzoi kryeministrin Edi Rama si të lidhur me bandat kriminale, ndërsa sipas tij, në këto katër vite Shqipëria është kthyer vendi i parë në Europë për prodhimin e kanabisit. "Projekti europian është nën presion në të gjithë Europën dhe në Shqipëri presioni vjen nga kërcënimi i krimit të organizuar dhe sipas Departamentit të Shtetit, Shqipëria është sot numri një i prodhimit në Europë të marijuanës, prodhimi i drogës është rritur 5 herë. Mijëra punëtorë ruhen nga njerëz të armatosur, është një industri e mbrojtur dhe e lidhur me qeverinë, kjo situatë dramatike është pasojë e drejtpërdrejtë e PS- së, e cila ka promovuar në parlament kriminelë", theksoi kreu i opozitës. Beteja e PD- së për zgjedhje të lira dhe për forcim të demokracisë, sipas Bashës është në të njëjtën kohë beteja për vetë projektin e Europës. Ju siguroj se me ndihmën tuaj dhe me qëndrimin e fortë për vlerat e përbashkëta që janë vetë identiteti i Europës, ne do të jemi të aftë të udhëheqim Shqipërinë jashtë kësaj, duke shkatërruar krimin e organizuar dhe duke u rikthyer sërish në themelin e demokracisë, shtetit ligjor, luftën kundër korrupsionit, tregun e lirë, konkurrencën, që përbëjnë identitetin e Europës, që përbëjnë të ardhmen europiane të Shqipërisë", u shpreh z. Basha. Gjatë qëndrimit në Maltë, kreu demokrat u takua dhe me kryeministrin e Hungarisë, Viktor Orban, të cilin e informoi për situatën politike në vendin tonë, ndërsa përmendi rrugëzgjidhjen përmes qeverisë teknike që do të zbatojë dekriminalizimin, luftojë drogën dhe paratë e pista dhe të krijojë kushtet për zgjedhje të lira dhe të ndershme. Ai informoi z. Orban mbi rrugëzgjidhjen përmes qeverisë teknike, që do të zbatojë dekriminalizimin, luftojë drogën dhe paratë e pista dhe të krijojë kushtet për zgjedhje të lira dhe të ndershme. Nga ana e tij, Orban deklaroi se partia simotër FIDESZ i jep mbështetje të plotë aksionit të opozitës, që synon garantimin e votës së lirë e të ndershme në vend.