Berisha: Zgjedhjet në rrezik, drejt destabilitetit

Situata

politike në vend ishte në qendër të takimit që ish- kryeministri Sali Berisha zhvilloi dje me ambasadorin italian, Alberto Cuttilo. Sipas Berishës, vendi ndodhet në një situatë të vështirë dhe të rrezikshme, që mund të çojë drejt desabilitetit, si pasojë e kanabizimit dhe pesëfishimit të pushtetit të bandave e krimit, "të cilat - është shprehur ai - janë kërcënim për zgjedhjet e lira e të ndershme". Pas kanabizimit të vendit, Berisha thotë se fshihet skenari për vjedhjen e zgjedhjeve, fenomen që sipas tij, ka shkatërruar më herët edhe zgjedhjet vendore në Peshkopi. Gjatë takimit me ambasadorin italian, Berisha është shprehur se zgjidhja vjen vetëm përmes qeverisë teknike, e cila do të mundësojë zgjedhjet e lira e të ndershme, miratimin e reformës në drejtësi dhe mundësojë zbatimin e dekriminalizimit dhe luftën kundër narkotikëve. Zoti Berisha theksoi se sot vendi ndodhet në një situatë të vështirë dhe të rrezikshme, e cila mund ta çojë atë drejt desabilitetit. Ai theksoi se një opozitë, kudo në botë, ka si mision kryesor zgjedhjet. Lidhur me këtë, zoti Berisha nënvizoi se, cilido qoftë dëshiron të vlerësojë objektivisht shkaqet themelore të protestës së opozitës, është i lutur t'i hedhë një sy raportit të OSBE/ ODHIR të zgjedhjeve vendore të vitit 2015. Ai theksoi se në këtë raport, me fakte të pakontestueshme denoncohet ndërhyrja e fuqishme në rezultatin e zgjedhjeve, e drogës dhe parave të saj, krimit dhe presionit të tij, blerjes masive të votës.