Komisionet e vetingut, Kuvendi seancë të jashtëzakonshme më 11 prill

Drejtuesja e ONM poston zarfin konfidencial me emrat e kandidatëve

Kuvendi i Shqipërisë do të mblidhet të martën, më 11 prill, në orën 18: 00, në një seancë të jashtëzakonshme plenare, për të diskutuar dhe miratuar ngritjen e komisioneve të vetingut. Kryetari i Kuvendit, Ilir Meta u dërgoi dje një letër kryetarëve të grupeve parlamentare, ku u kërkon që deri në orën 16: 00 të së martës ata të sjellin emrat e përfaqësuesve për komisionin ad hoc. Sipas njoftimit zyrtar nga Kuvendi, rendi i ditës parashikon dy projektvendime: "Për procedurat parlamentare për funksionimin e komisioneve ad hoc dhe realizimin e procesit të votimit sipas ligjit "Për rivlerësimin kalimtar të gjyqtarëve dhe prokurorëve", dhe të projektvendimit "Për krijimin dhe përbërjen e komisionit ad hoc për verifikimin e kandidatëve për institucionet e rivlerësimit". Dje, vetë shefja e ONM- së, Genoveva Ruiz Calavera postoi në rrjetet sociale fotografinë e zarfit me mbishkrimin "konfidencial", ku janë emrat e seleksionuar të kandidatëve që plotësojnë dhe nuk plotësojnë kriteret për të qenë pjesë e këtyre komisioneve të vetingut. "Është e rëndësishme të kemi një sistemin gjyqësor të besueshëm për qytetarët dhe të ardhmen europiane të Shqipërisë", shkruan Calavera. ONM- ja i dorëzoi te Totozani reko- mandimet e reja për procesin e formimit të institucioneve për rivlerësimin e figurës të njerëzve të drejtësisë ( vetingut). Pak ditë më parë, Avokati i Popullit publikoi listën emërore të 84 kandidatëve që kualifikohen për institucionet e vetingut dhe 104 të tjerëve që nuk kanë arritur të përmbushin kriteret e kërkuara nga ligji. Nga këta 84 vetë, ONM- ja ka dhënë rekomandim negativ për 17 persona.