Rama: Humbim shumë nëse biem në grackat e bulevardit në Tiranë
Replikat për urën e Bunës, kryeministri: Fle si Luli. Ademi: Bëre autogol "Qeveria nuk është karrige, por përgjegjësi"
Kryeministri Edi Rama u "përplas" dje me kryetaren e Bashkisë së Shkodrës, Voltana Ademi në lidhje me rikonstruksionin e urës së Bunës. Ndërsa ishte në një takim me të rinj shkodranë që votojnë për herë të parë, kreu i qeverisë kritikoi kryebashkiaken e këtij qyteti për punët e pabëra në këtë qytet. "Kur po vija, kam postuar urën e Bunës. ' Nuk kena lek!' thotë; po ura e Bunës nuk ka nevojë për lekë, ka nevojë vetëm ta duash Shkodrën. Të bësh një riparim. Tani Voltanë, ose rregullo urën e Bunës për një javë, ose do ta rregullojmë ne, ndërtim pa leje!" - paralajmëroi kryeministri. I menjëhershëm qe reagimi i kryetares së Bashkisë së Shkodrës, Ademi. "Kryeministër, sa herë flet për Shkodrën, ti bën autogol! Shumë komode të të kem ty kundërshtar politik. Edhe një grusht njerëzish socialistë që të kanë mbetë në Shkodër e dinë se ura e Bunës është pronë e Ministrisë së Mbrojtjes. Ju vetë, qëllimisht po tentoni ta shkatërroni Shkodrën, por nuk ia dolën asnjë, as komunizmi! E këtë lojë e kanë kuptuar të gjithë", - u shpreh Ademi, duke publikuar shkresën që i kishte dërguar Ministrisë së Mbrojtjes. "Nëse ke dashuri për Shkodrën, atëherë, mos e shkatërro, siç po bën, për hakmarrje politike. Dhe nëse ke dëshirë të drejtosh Shkodrën, në qofsh burrë, hajde pas dy vitesh, konkurro këtu në Shkodër përballë meje!" - i tha Ademi, Ramës. Ndërsa Rama, duke postuar një foto ku shfaqen plehrat pranë urës së Bunës, shkroi në "FB": "Voltana, ti në Bashkinë e Shkodrës nuk bën asgjë më shumë sesa ç'bëri Lulzimi në Bashkinë e Tiranës, d. m. th. vetëm fle, dhe në jetë nuk bën asgjë më shumë sesa ç'bën Lulëzimi në çadër, d. m. th. flet, por nuk mban përgjegjësi për çfarë thua! Po njësoj si Lulzimi, ti i jep shumë rëndësi vetes duke menduar se unë jam kundërshtari yt. Por në fakt unë jam thjesht kundërshtari i dembelëve që u punon gjuha, jo truri, i parazitëve që u punon goja, jo zemra, i karagjozëve që u punon djallëzia, jo qytetaria", - u shpreh kryeministri. "Ndërkohë unë i shkreti do vazhdoj thjesht të mundohem të të zgjoj nga gjumi, sa herë flas për Shkodrën, sepse më dhimbset Shkodra, jo se dua të hakmerrem për ëndrrat e tua të rehat-
shme. Po që të mos e zgjas, se do jesh duke fjetur, fatmirësisht kam shahit disa kolegë të tutë demokratë që nuk ngjajnë as me Lulzimin, as me ty, nga Tropoja në Përmet!" - i tha Rama. Rama i sqaroi se "Ura e Bunës është simbol i qytetit, jo aset i ushtrisë". Në këtë mes reagoi edhe Ministria e Mbrojtjes. "Ministria e Mbrojtjes nuk ka asnjë
detyrim të ndërtojë ura, edhe pse vullnetarisht u jemi përgjigjur kërkesave të pushtetit vendor duke ndërhyrë për ndërtimin e tyre kudo ku vlerësohet se i shërbejnë lëvizjes strategjike. Për sa i përket urës së Bunës në Shkodër, bëjmë me dije se ajo nuk është pronë e Ministrisë së Mbrojtjes", thuhet në njoftimin e Ministrisë së Mbrojtjes. "Zgjedhje nuk diskutohet që në 18 qershor, - lëreni se çfarë thonë dhe unë mendoj se do vijnë në zgjedhje, por edhe po nuk erdhën, është zgjedhja e tyre. Por drejtësinë ata nuk e marrin dot peng! Por shtetin, Shqipërinë nuk e ndalojnë dot më të bëhet shtet, se boll e ndaluan 25 vjet me radhë", - u shpreh dje, Rama.
ZGJEDHJET
Ndërkaq, gjatë takimit që pati me të rinjtë, Rama u shpreh qartë se zgjedhjet do të jenë më 18 qershor, pavarësisht nëse vjen apo jo PD- ja. "Kjo është luftë për Shqipërinë që duam! Kjo është luftë për të përcaktuar nëse këtu në këtë vend do ketë shtet, nëse qytetarët e këtij vendi do kenë drejtësi", - tha Rama, sipas të cilit, "kjo është një luftë që nuk bëhet duke i ikur popullit. Të thuash që, ' jo, këtë nuk e vendos populli, këtë e vendosim ne'. Po kush jemi ne që vendoskemi që të mos paraqitemi në ditën e përcaktuar nga Kushtetuta përpara gjykimit të popullit?!" Duke i kthyer përgjigje aleatit të tij Ilir Meta, Rama u shpreh: "I keni dëgjuar kur thonë, ' hajde të lëshojmë ne ca vende që t'i zënë këta'? Po mirë, çfarë është qeveria? Hotel Rozafa? Disa dhoma i lëshojmë ne që të futen disa të tjerë! Po kur thonë, ' por jo, se ne s'jemi të lidhur me karrigen'? Qeveria nuk është karrige! Qeveria është përgjegjësi përpara popullit! Lëshon këtë përgjegjësi, ka lëshuar popullin e vet në dhëmbët e së panjohurës! Të jesh kryeministër i vendit nuk është të jesh i privilegjuar sepse ke suitën e Hotel Rozafës edhe tani ' dil nga suita, të fusim edhe këta, që ta bëjnë edhe këta një dush sepse kanë 50 ditë në çadër'! Të jesh kryeministër i një vendi do të thotë të mbash përgjegjësi përpara njerë- zve që kanë përcaktuar këtë detyrë", - u shpreh Rama. "Ka shumë për të humbur, nëse ne biem në grackën e bulevardit të Tiranës dhe bëhemi bashkë në tavolinën e rakisë të katundit politik dhe mediatik dhe fillojmë dhe ne rrjepim pula, hedhim pula e bëjmë sikur ushqejmë popullin me pula", - u shpreh Rama.