Sekuestrohen 12 tonë kanabis në Përmet
Droga e siguruar në zonat përreth, Korça dhe Skrapari. Dyshohet për policë të përfshirë në aktivitetin kriminal Shpallet në kërkim personi që administronte objektin dhe 4 të tjerë
Një sasi rekord droge është sekuestruar dje në fshatin Pagri të Përmetit. Burime zyrtare nga Policia e Shtetit bënë me dije se rreth 12 tonë kanabis sativa u gjet në një magazinë, e futur në thasë. Mësohet se në operacionin masiv ( ka vijuar për disa orë) morën pjesë Antidroga, Forcat e Posaçme Operacionale, Drejtoria e Policisë Gjirokastër, SHÇBA dhe Policia e Përmetit. Sipas burimeve të mësipërme, pas peshimit, rezultoi se në magazinë kishte 11 tonë e 850 kg lëndë narkotike. Ndërkohë, burimet e mësipërme deklaruan se është identifikuar dhe shpallur në kërkim personi që administronte objektin ku u gjet sasia e madhe e kanabisit si 4 persona të tjerë. Ndërsa janë shoqëruar dhe marrë në pyetje edhe disa banorë të zonës që dyshohet se kanë pasur dijeni për drogën.
OPERACIONI
Pas informacioneve të siguruara në rrugë opera- tive se në një magazinë ishte fshehur një sasi e madhe droge, policia ka ndërmarrë një super- operacion në fshatin Pagri të Përmetit. Uniformat blu kanë ushtruar kontroll jo vetëm në magazinën ku u gjetën dhe u sekuestruan 409 thasë me kanabis, por në të gjithë zonën. Mësohet se droga ishte në proces tharjeje, gati për t'u trafikuar. Sipas burimeve të mësipërme, magazina ndodhet në një zonë të thyer, pranë një gryke mali. Vetëm para dy muajsh, magazina është kontrolluar nga policia në prani edhe të personit që administron objek- tin, i cili ka firmosur në procesverbal. Por, në atë kohë rezultoi se ishte bosh. Sipas hetuesve të çështjes, droga mund të jetë transportuar nga zonat përreth, por edhe nga Korça dhe Skrapari, nga frika e kontrolleve të policisë. Pas operacionit të djeshëm, blutë shpallën në kërkim personin që administron magazinën si dhe 4 persona të tjerë, emrat e të cilëve nuk bëhen me dije për shkak të sekretit hetimor. Ndërsa, dyshohet që magazina zotërohej nga tri grupe kriminale. Gjithashtu, dyshohet edhe për efektivë policie të përfshirë në këtë ak-
tivitet kriminal. Ndaj dhe në operacion ka marrë pjesë dhe SHÇBA ( Shërbimi i Kontrollit të Brendshëm dhe Ankesave). Policia dhe prokuroria po punojnë intensivisht për zbardhjen e plotë të kësaj ngjarjeje dhe vënien në pranga të autorëve të krimit.