Të ardhurat nga turizmi, 1.5 miliardë euro në një vit
Ekonomi: Qeveria uli TVSH- në, 4.7 mln turistë vizituan Shqipërinë në 2016- ën Panairi i turizmit mesdhetar, për herë të parë në Tiranë
Vendimi i qeverisë për uljen e TVSH- së në sektorin e turizmit pritet të reflektohet në rritje të cilësisë së akomodimit e shërbimit. Shqipëria priti rreth 4 milionë e 7 qind mijë turistë dhe për këtë vit pret një rritje të numrit të tyre. Shqipëria shënoi nivelin më të lartë të të ardhurave nga turizmi në 2016- ën me më shumë se 1.5 miliardë euro dhe një rritje prej 13% krahasuar me një vit më parë. Të dhënat janë bërë të ditura dje gjatë ceremonisë së hapjes së Panairit të Parë Mesdhetar i Turizmit, në "Expocity" në Tiranë, i cili synon ta fusë Shqipërinë në kalendarin ndërkombëtar të panaireve, si dhe të jetë një pikë takimi i një rëndësie rajonale mes subjekteve që operojnë në këtë sektor. Në ceremoninë e hapjes mori pjesë ministrja e Zhvillimit Ekonomik, Turizmit, Tregtisë dhe Sipërmarrjes, znj. Milva Ekonomi, e cila në mënyrë simbolike preu dhe shiritin e këtij panairi të parë, duke uruar që ai të bëhet i përvitshëm dhe të sjellë një vlerë të shtuar në turizmin shqiptar. Në këtë panair janë 72 stenda dhe rreth 120 subjekte, ku risi është prezantimi i secilës bashki të vendit, që nga Malësia e Madhe e deri në Sarandë. Produktet e paraqitura në këtë panair janë nga më të larmishmet, që nga paketat turistike, produktet e kulinarisë, kostumografisë, punimeve artizanale e gjithçka tjetër të bukur dhe me vlerë që ka vendi ynë. Gjithashtu, merrnin pjesë agjenci turistike nga Maqedonia, Kosova, Mali i Zi, nga Italia, nga Greqia, të përfaqësuara nga ambasadat që i takojnë zonës së Mesdheut. Ky panair që do të zgjasë dy ditë ( 8- 9 prill) u organizua nën kujdesin e Ministrisë së Zhvillimit Ekonomik, Turizmit, Tregti- së dhe Sipërmarrjes me bashkorganizatorë Agjencinë Kombëtare të Turizmit, Unioni Turistik Shqiptar dhe Shoqata Turistike Shqiptare. Në ceremoninë e hapjes, ministrja Ekonomi mbajti një fjalë, ku përshëndeti gjithë të ftuarit dhe pjesëmarrësit. Ajo u shpreh shumë entuziaste, që më në fund Shqipëria ia doli të organizojë një panair të sajin
dhe të mos jetë thjesht pjesëmarrëse në panaire turizmi në botë. Duke shfrytëzuar këtë mundësi, ministrja ndau gjithë arritjet e Shqipërisë në turizëm, veçanërisht vitin e fundit, të cilat kanë qenë të shumta dhe e kanë renditur Shqipërinë
mjaft mirë në zhvillimin e këtij sektori, hapjen e vendeve të punës, sigurinë dhe hapjen e Shqipërisë, pra brandimin e saj në botë. "Sot në këtë panair kam dhe një lajm shumë të gëzuar për të gjithë ata që janë sipërmarrës turistikë në pjesën e seg- mentit të sipërmarrjeve akomoduese. Ju dëgjuat që qeveria sapo kaloi për miratim në Kuvend ligjin për uljen e TVSH- së në strukturat akomoduese, i cili zbret nga 20 për qind në 6 për qind. Ky është një lajm shumë i mirë. Por, padyshim që është një lajm shumë i mirë edhe raporti që publikoi ' World Economic Forum', para dy ditëve, për indeksin e konkurrueshmërisë në sektorin e turizmit dhe udhëtimeve, ku Shqipëria u rankua në 15 vendet që kanë bërë progres në fushën e turizmit, duke përmirësuar pozicionin e vet me 8 pikë. Kështu që për ta gjithë ata që janë sipërmarrës turistikë, padyshim që këto janë lajme shumë të mira", - tha Ekonomi. Nga ana tjetër, një lajm i rëndësishëm është që edhe në matjet që bëjnë institucionet shqiptare si Banka e Shqipërisë nëpërmjet bilancit të pagesave tregojnë se kontributi i këtij sektori në ekonominë e vendit është duke u rritur. "Në përgjithësi, sektori i turizmit në vitin 2016 kontribuoi me 7% në Prodhimin e Brendshëm Bruto, punësoi në totalin e vet 267 mijë individë, të cilët nuk hyjnë vetëm në punësimin direkt të turizmit, por edhe në punësimin indirekt, çka do të thotë se ekonomitë e vogla rajonale përfituan nga paketa turistike që ato afruan, duke vënë në shërbim edhe ekonomitë ndihmëse të turizmit. Është një fakt i rëndësishëm që edhe botimi i ' World Trade Tourism Center' tregoi që në Shqipëri punësimi që vjen nga turizmi renditej në vendin e katërt, lajme që janë shumë të mira për industrinë turistike në vendin tonë", - tha Ekonomi.
“Sektori i turizmit në vitin 2016 kontribuoi me 7% në Prodhimin e Brendshëm Bruto, punësoi në totalin e vet 267 mijë individë, të cilët nuk hyjnë vetëm në punësimin direkt të turizmit, por edhe në punësimin indirekt”.