Trafiku i drogës nga Gjiri i Lalëzit drejt Italisë, burg për 4 të dyshuarit, njëri lirohet
Dy shtetasit italianë dalin sot para gjykatës
Gjykata
e Krimeve të Rënda caktoi dje masën e sigurisë për 5 nga 7 personat e arrestuar të shtunën si pjesë e një grupi kriminal që kishte planifikuar trafikimin e një sasie të konsiderueshme kanabisi nga bregdeti i Gjirit të Lalëzit drejt Brindizit, Itali. Togat e zeza lanë në burg deri në përfundim të hetimeve 4 prej tyre, ndërsa për personin tjetër u caktua masa e sigurisë "Detyrim paraqitjeje". "Arrest me burg" u caktua për Eduart Sallakun, i cilësuar si organizatori dhe kreu i grupit, si dhe tre pjesëtarët e fisit Brahja, Gjon, Jurgen dhe Vitor Brahja. Ndërsa për Lazër Lazrin, pronar i njërit prej skafeve, u caktua "Detyrim paraqitjeje". Sipas prokurorisë, ky i fundit ka bashkëpunuar me grupin në fjalë vetëm duke siguruar bidonët me benzinë për gomonen si dhe kishte rënë dakord që të ndihmonte në ngarkimin e lëndës narkotike në gomone. Ndërkohë që asnjëri prej të pandehurve të tjerë nuk ka pran- uar akuzat e ngritura ndaj tyre. Grupi i drogës u zbulua nga përgjimet telefonike. Prokuroria ka përcaktuar rolin e secilit në planin e trafikut, i cili nuk u arrit të realizohej. Ndërkaq, avokati i Eduart Sallakut deklaroi për mediat se prokuroria nuk ka asnjë provë për klientin e tij, pasi për aq kohë sa nuk ka drogë, nuk mund të ketë as akuzë. Si pjesë të këtij grupi, Prokuroria e Krimeve të Rënda ka arrestuar edhe dy shtetasit italianë Gianfranco Maiorano dhe Donato Carlucci, të cilët pritet të dalin sot para gjykatës. Në datën 5 prill, ky grup do të trafikon- te drejt Italisë sasi të konsiderueshme kanabisi. Vitor, Jurgen dhe Gjon Brahja do të merreshin me transportin e drogës në skafin e Lazër Lazrit. Ndërsa në det të hapur prisnin dy italianët me një tjetër skaf. Gjatë hetimit të Prokurorisë për Krime të Rënda, rezulton se Eduart Sallaku, në bashkëpunim me shtetasit italianë Gianfranco Maiorano ( me precedent penal në shtetit italian, më shumë se një herë) dhe Donato Carlucci, kanë bërë përgatitjet e nevojshme për të trafikuar një sasi të konsiderueshme lënde narkotike. Personat e lartpërmendur akuzohen për veprat penale "Trafikim i narkotikëve", mbetur në tentativë; "Pastrim i produkteve të veprës penale ose veprimtarisë kriminale" dhe "Grup i strukturuar kriminal".