Takimi për kanabisin, kryepleqtë "përplasen" me policinë dhe prefektin Radovani
SHKODËR - Alarmi i policisë se në shumë fshatra të Shkodrës po përgatitet mbjellje masive e kanabisit ka bërë që prefekti Paulin Radovani, në një takim pa praninë e mediave të thërrasë kreun e policisë së qarkut, Alban Çela; administratorë të njësive vendore, përfaqësues të bashkive dhe kryetarët e fshatrave. Gjatë takimit të djeshëm, Çela paralajmëroi burgim për çdo kryetar fshati në rast se në zonën e tyre do të konstatohet qoftë një rrënjë e vetme e mbjellë me kanabis. Kjo ka rebeluar kryepleqtë, të cilët kanë ikur nga takimi. Disa prej tyre deklaruan se, "ajo që u tha në takim ishte absurde, pasi të gjithë fajin duan t'ua lënë kryepleqve. Duan të merren me ne kryepleqtë dhe nuk shkojnë të merren me ata që e kanë mbushur të gjithë Shqipërinë me drogë dhe e mbjellin kudo. Ne u çuam dhe dolëm jashtë mbledhjes, sepse nuk jemi dakord me atë që thonë, për të na e lënë të gjithë fajin neve. Nuk marrim urdhra nga ata, por nga bashkitë. Nuk marrim urdhra as nga prefekti Paulin Radovani, që jo e ka mbjellë, por ai me shokët e tij e kanë mbushur vendin me drogë komplet. Na thonë që të futemi në gardhe, oborre e shtëpi dhe të kontrollojmë, por ne s'jemi për atë punë. Ne kemi detyrë t'i shkojmë mbrapa policisë dhe të bashkëpunojmë dhe jo të kontrollojmë". Ndërkaq, Lekë Vukaj, kryetar i fshatit Hot i Ri në Njësinë Rrethina dhe Fran Radohina, kryetar i fshatit Bleran të Njësisë Rrethina pohuan se "nuk e ruan i gjithë shteti drogën dhe këta duan të fusin kryepleqtë në burg. Ne nuk kemi të drejtë të merremi me atë punë. S'kemi të drejtë të futemi nëpër avlli të kontrollojmë drogën. Ne jemi gati të bashkëpunojmë me ta. Ne dolëm jashtë nga mbledhja, sepse drejtori i policisë tha se duhet që të arrestohemi ne. S'mund të marrim ne përgjegjësi për drogën, kur nuk e ruan e gjithë qeveria dhe shteti". se. ni.