Majko: Kam dyshim. Dervishaj: Nuk mund të bëjmë qendra pa bërë rrugë
PS miraton projektin për rrugën Tiranë- Elbasan
Komisioni
i Ligjeve miratoi dje, marrëveshjen e debatuar edhe një ditë më parë për ndërtimin e segmenteve të mbetura të aksit nacional Tiranë- Elbasan, investim në vlerën e 35 milionë dollarëve. Në Komisionin e Ligjeve ishte dje vetë ministri i Transporteve, Sokol Dervishaj. Deputetët e PS- së shfaqën shqetësimin se po krijohen raste me precedentë rrugë që nuk përfundojnë, mungesë studimesh fizibiliteti që kërkojnë investime të konsiderueshme, por në fund e votuan marrëveshjen për ndërtimin e 4 km rrugë të mbetur në aksin nacional TiranëElbasan, pavarësisht shqetësimit se gjatësia e këtij segmenti, siç thanë ata 4 km, nuk e justifikon shumën 35 milionë dollarë. Deputeti Pandeli Majko ishte i ashpër në qëndrimin e tij kur tha se në këtë mënyrë po krijohet një precedent i rrezikshëm. "Për 4 km na duhen 35 milionë dollarë, ky është një precedent shumë i rrezikshëm. Kam një dyshim jashtëzakonisht të madh, me thënë të drejtën, më duket sikur rruga Tiranë- Elbasan rrezikon të kthehet apo të konsiderohet një varrezë lekësh", - tha deputeti Majko. Ministria e Transporteve sqaron se nuk bëhet fjalë për 4 km, por për 14 km ndërhyrje në skarpate, ndërhyje në Mullet dhe në Ibë, ku ka pasur rrëshqitje të dheut. "Fillojmë një segment rrugor të cilin e lëmë në mes, nuk përfundon asnjëri. Nuk mund të bëjmë një qendër të bukur qyteti pa bërë rrugën nacionale që na çon te qendra e qytetit", - u shpreh ministri i LSI- së, edhe me një ironi për qeverinë.