Trafiku i drogës Shqipëri- Greqi, ja si bashkëpunonin shqiptarët me maqedonasit
Një
operacion ndërkombëtar antidrogë ka çuar në ar restimin e 22 personave, ndërsa janë sekuestruar kokainë, heroinë, kanabis sativa si dhe fara kanabisi. Operacioni i koduar "ALIAS" u finalizua me sukses nga Policia e Shtetit, Prokuroria e Krimeve të Rënda Tiranë, DEA, Policia Greke dhe Policia Maqedonase. Policia e Shtetit njoftoi zyrtarisht se ditën e djeshme janë arrestuar 6 persona, ndërsa të tjerët janë vënë në pranga në kohë të ndryshme. Të arrestuarit janë: Jorgo Dulia, 43 vjeç, arrestuar dje në Tiranë; Gazmend Lleshanaku, 45 vjeç, arrestuar dje në Elbasan; Aurel Toska, 37 vjeç, arrestuar dje në Pogradec; Isak Alla, 55 vjeç, arrestuar dje në Elbasan; Jani ( Ilir) Meçja, 45 vjeç, arrestuar dje në Elbasan; Gëzim Balla, 43 vjeç, arrestuar dje në Elbasan; Arben Pilinçi, 45 vjeç, Podgorie, Korçë; Malti ( Ermal) Kungulli, 29 vjeç, Podgorie, Korçë; Arben Alushi, 46 vjeç, lindur në Ersekë dhe banues në Fier; Mehmet Skënderaj, 64 vjeç; Leo Tafa, 34 vjeç; Eglantin Tafa, 36 vjeç; Ardit Tafa, 21 vjeç; Dorian Tafa, 35 vjeç; Miklovan Kuka, 32 vjeç; Artan Skënderaj, 36 vjeç; Meto Skënderaj, 39 vjeç; Ledjo Nikollaq Llozi, 25 vjeç; Vasil Tashio, 43 vjeç; Sokol Filipi, 27 vjeç; Nori Bardhi, 34 vjeç; dhe Dimitrios Papadopoulos. Gjithashtu, po në kuadër të këtij hetimi janë proceduar në gjendje të lirë tre shtetas. Ndërsa janë sekuestruar 244 kg e 818 gr kanabis, 425 fara kanabisi, 1 kg e 30 gr heroinë, 247.3 gr kokainë, 3140 euro, 25.000 lekë, tri automjete dhe 10 telefona celularë. Për 6 personat e arrestuar dje, Gjykata e Krimeve të Rënda caktoi masën e sigurisë "arrest me burg". Nga hetimet rezultoi se, organizatorë ishin shtetasit Gazmend Lleshanaku dhe Jorgo Dulla, ndërsa bashkëpunëtorë Isak Alla dhe Aurel Toska. Kurse Gëzim Balla dhe Jani Meçja akuzohen për moskallëzim të krimit. Nën drejtimin e organizatorëve Lleshanaku dhe Dulla, të arrestuarit kishin krijuar një rrjet të gjerë sigurimi, transportimi dhe trafikimi të lëndës narkotike nga Shqipëria në drejtim të Greqisë. Ky trafik realizohej nëpërmjet kufirit Shqipëri- Greqi ose Maqedoni- Greqi. Hetimi për këtë grup ka nisur në qershor të 2016- ës, në pikën e kalimit kufitar të Qafë- Thanës, kur janë arrestuar dy maqedonasit Muzafer Saliju dhe Aleksandar Tprevski, të cilët kishin kontaktuar Gazmend Lleshanakun nga Elbasani për të gjetur mënyrën e trafikimit të lëndës narkotike nga Shqipëria në Maqedoni, nëpërmjet pikës kufitare të Qafë- Thanës. Lleshanaku kishte kontaktuar me bashkëpunëtorin e tij Isak Alla, për të transportuar një ngarkesë narkotikësh deri në Përrenjas, ku do të takoheshin me dy shtetas maqedonas. Në mjetin e Lleshanakut ishin edhe shtetasit Gëzim Balla dhe Jani Meçja, të cilët, siç rezultoi nga hetimi, kanë pasur dijeni, por nuk kanë marrë pjesë në trafikim. Pasi janë takuar me maqedonasit dhe i kanë treguar cilësinë e "mallit", Isak Alla e ka dërguar lëndën narkotike në një shtëpi në Përrenjas. Shtetasit maqedonas, pasi kanë rënë dakord "me pazarin", janë larguar drejt Maqedonisë, ndërkohë Lleshanaku, Alla dhe dy miqtë e tyre janë nisur për në Librazhd. Më pas, shtetasit maqedonas u arrestuan nga autoritetet e vendit fqinj. xhe. ko.