"Ja si u masakrua brenda në dyqan 60- vjeçari Agim Arapi"
"Jurgen Kurti s'mori pjesë në përleshje. Viktima vdiq nga problemet në zemër" Policia: U godit me grushte nga 2 vëllezërit Ekonomi
Një ditë pas vrasjes së 60- vjeçarit Agim Arapi, policia e Durrësit ka zbardhur kronologjinë e plotë të ngjarjes që tronditi mbrëmjen e së martës banorët e qytetit bregdetar. Pas kryerjes së hetimeve, blutë pohuan se krimi ka ndodhur gjatë një konflikti mes dy vëllezërve Konstandin dhe Kujtim Ekonomi si dhe dhëndrit të Konstandinit, Jurgen Kurti. Mësohet se palët janë konfliktuar me njëri- tjetrin për një tub aspirimi. Sipas hetuesve të çështjes, viktima i ka kërkuar 24- vjeçarit Kurti lekët e qirasë ( 13 mijë lekë të reja) për kalimin e tubit të aspirimit të picerisë në pronësi të këtij të fundit përmes dyqanit të tij. Po të njëjtat burime pohuan se 60- vjeçari është goditur me grushte nga vëllezërit Ekonomi. Ndërsa, i ka shpëtuar akuzës dhëndri i tyre Jurgen Kurti, i cili një vit më parë u hetua për vrasjen e babait të tij. Ndërkohë, policia e Durrësit ka deklaruar se nga ekspertiza mjeko- ligjore u vërtetua se Agim Arapi ka ndërruar jetë për shkak të problemeve që ka pasur me zemrën. 54vjeçari Konstandin Ekonomi dhe vëllai i tij 50vjeçar Kujtim Ekonomi kanë përfunduar në pranga, ndërsa akuzohen për veprat penale "Vrasje me dashje", kryer në bashkëpunim, dhe "Prodhimi, mbajtja, blerja apo shitja pa leje e armëve të ftohta".
HETIMI
Ngjarja e ndodhur në lagjen nr. 1 të qytetit të Durrësit ( në bulevardin "Epidam") ku humbi jetën Agim Arapi ka alarmuar policinë, e cila ka nisur menjëherë hetimet për zbardhjen e ngjarjes. Pas verifikimit të pamjeve filmike dhe provave në vendngjarje, hetuesit e çështjes pohuan se krimi është kryer nga dy vëllezërit Ekonomi për motive të dobëta, ndërkohë që dhëndri i njërit prej vëllezërve Ekonomi, Jurgen Kurti, nuk ka qenë i përfshirë në këtë ngjarje. Sipas bluve, dy vëllezërit Ekonomi dhe Jurgen Kurti që u shoqërua mbrëmjen e së martës, i detyroheshin viktimës që t'i paguanin një shumë prej 13 mijë lekësh të reja për tubin e aspirimit. Mësohet se tubi i aspirimit të picerisë në pronësi të Jurgen Kurtit përshkon dyqanin ushqimor të Shpresa Arapit. Më herët palët kishin rënë dakord që tubi i aspirimit do të kalojë nëpërm- jet dyqanit të bashkëshortëve Arapi. Kjo kundrejt qirasë në shumën në fjalë, por që nuk ishte paguar nga Kurti në muajin mars dhe në prill. Viktima i ka kërkuar 24- vjeçarit paratë dhe në debat e sipër, kanë shkuar dhe janë përfshirë në konflikt edhe dy vëllezërit Ekonomi. Këto dy të fundit e kanë futur 60- vjeçarin Agim Arapi brenda në dyqanin ushqimor dhe kanë mbyllur qepenin, dhe më pas e kanë goditur atë me grushte. Gjatë kësaj kohe ( sipas policisë), Jurgen Kurti ka qenë jashtë dyqanit ushqimor ( qepeni ishte i mbyllur dhe brenda ndodheshin viktima dhe autorët). Gjatë këqyrjes së vendit të ngjarjes, u gjet dhe sekuestrua në cilësinë e provës materiale një thikë. Pavarësisht se Arapi është rrahur barbarisht në dyqa- nin e tij, ekspertiza ka dalë në konkluzionin se ai ka ndërruar jetë për shkak të problemeve që ka pasur me zemrën. Materialet procedurale në lidhje me këtë ngjarje iu përcollën për hetime të mëtejshme prokurorisë së Durrësit.