Ankesat e profesorëve, qeveria ndryshon vendimin për statusin
"GSH" publikoi zërat kundër, Jubani: Rritje e turpshme. Shehri: U shtua me 120 lekë Rishikohet pjesa e pagave për akademikët
Këshilli i Ministrave ka ndryshuar vendi min "Për statusin dhe trajtimin e veçantë të personelit akademik", i cili u kundërshtua nga profesorët e Universitetit të Tiranës. Pas vendimit të parë, të marrë në datën 29 mars, zëra të njohur të botës akademike, e cilësuan atë si të turpshëm, ndërkohë që VKM- ja e publikuar në faqen zyrtare të Këshillit të Ministrave u hoq. Ndërkaq, ditën e djeshme ajo u ripublikua, ndërsa ndryshimi është bërë në pikën 17, ku përcaktohet paga e personelit akademik. Sipas vendimit të ri, "Pagat e personelit akademik të të gjitha kategorive përcaktohen nga Bordi i Administrimit, pasi ka marrë mendimin e Senatit Akademik, por jo më shumë se kufijtë maksimalë të pagës për funksion/ titull, të përcaktuar në vendimin e Këshillit të Ministrave, ' Për trajtimin me pagë dhe shtesa mbi pagë të punonjësve të personelit akademik të institucioneve publike të arsimit të lartë'". Ndërkohë që, në vendimin e mëparshëm ishte përcaktuar se "Pagat e personelit akademik të të gjitha kategorive përcaktohen nga Bordi i Administrimit, pasi ka marrë mendimin e Senatit Akademik, sipas kuadrit ligjor në fuqi".
DENONCIMI
"Gazeta Shqiptare" ishte e vetmja media që përcolli shqetësimin e akademikëve. Në shkrimin e publikuar në datën 1 prill, denoncohej fakti se ' profesorët e Universitetit të Tiranës kundërshtonin masën e rritjes së pagesës për orët shtesë'. Më konkretisht, sipas zv. dekanes për anën mësimorekërkimore të Departamentit të Historisë dhe Gjeografisë, prof. dr. Aljula Jubani, variantet e miratuara ishin të turpshme. Përmes një postimi në rrjetin social "Facebook", Jubani tha se: "Në media po qarkullojnë disa variante të një VKM- je në lidhje me pagat e pedagogëve. Secili variant është më i turpshëm se tjetri dhe asnjëri nuk ka lidhje me projektvendimet e konsultuara paraprakisht në rrugë zyrtare. Urojmë të mos jenë të vërteta!" Ndërkaq, e kontaktuar nga "Gazeta Shqiptare", zv. dekania tha se për një koment më të plotë do t'i duhet të konsultojë shkresën zyrtare, që ende nuk u ka shkuar në universitet. "Neve nuk na ka ardhur asgjë zyrtarisht. Paraprakisht neve na janë përcjellë projekt- VKM- të, të cilat i kemi konsultuar dhe i kemi rikthyer me sugjerimet tona. Të paktën këto variante që kam parë unë, asnjëri nuk ka lidhje me atë që na kanë sjellë neve. Për ne do të jetë zyrtare kur të na përcillet me shkresë në universitet. Por, gjithsesi këto nuk kanë lidhje fare me VKM- të që kanë ardhur për mendim, janë krejt ndryshe", - u shpreh Jubani, rreth 2 javë më parë. Edhe ish- shefja e Departamentit të Letërsisë, aktualisht pedagoge, prof. Dhurata Shehri reagoi në rrjetin social "Facebook", duke ironizuar rritjen e bërë nga qeveria. "Sot qarkulloi në media një Vendim i Këshillit të Ministrave që rrit pagesën e orëve të mundshme shtesë me 120 lekë të reja. A thua ky vendim po mbulon faktin që shtesën e pagave të pedagogëve, të shpallur prej muajsh, shteti vetëm e shpall po nuk e jep realisht dhe buxhetin për universitetet nuk e ka llogaritur me pagat e reja të shpallura? Gjithsesi duhet pritur e hëna, ditë rrogash, dy ditë pas një prillit!", shkroi Shehri. Po ashtu, në një postim të dytë, pedagogia e njohur, teksa vijoi komentin e saj, shkroi: "Ndjesë profesorëve të asociuar për pasaktësinë, atyre u është rritur ora me 111 lekë".