Nishani kërkon tryezën: Largohuni nga retorika!
Kreu i shtetit, thirrje partive politike: Palët të ulen në tryezë me axhendë serioze "Deklaratat e kryeministrit, me sfond politik"
Presidenti i Republikës, Bujar Nishani u bën thirrje palëve politike që të angazhohen seriozisht për një tryezë dialogu dhe të largohen nga retorikat boshe. Presidenca përmes zëdhënëses Brikena Arapaj thekson se kreu i shtetit ka ofruar vullnetin e tij për të krijuar kushtet për dialog midis mazhorancës dhe opozitës. Sipas Nishanit, dialogu duhet jetë në shërbim të çtensionimit të situatës. Zëdhënësja Arapaj vë në dukje se Presidenti i Republikës ka ofruar vullnetin e tij dhe është angazhuar për të krijuar të gjitha kushtet e nevojshme dhe realizimin e një dialogu politik midis maxhorancës dhe opozitës. Por, sipas Arapajt askush nuk mund të fyejë dhe të keqpërdorë seriozitetin e vullnetit dhe angazhimit, dinjitetin dhe integritetin e institucionit më të lartë të shtetit të shqiptarëve. "Presidenti i Republikës i vlerëson si shumë të rëndësishme rekomandimet teknike të OSBE/ ODIHR- it për Kodin Zgjedhor, por këto janë çështje për diskutim dhe zgjidhje në tavolinën e Komisionit Parlamentar të Reformës Zgjedhore dhe jo e axhendës presidenciale për tejkalimin e krizës politike në vend. Institucioni i Presidentit të Republikës u bën edhe njëherë thirrje palëve të ulen në tryezën e dialogut me axhendë serioze dhe të gjithëpranuar, duke u larguar nga retorika pa produkt, në shërbim të çtensionimit të situatës dhe përmbushjes së detyrimeve ndaj qytetarëve shqiptarë për të pasur mundësinë të votojnë të lirë në zgjedhjet e ardhshme politike në vend", deklaroi zëdhënësja e presidentit. Zj. Arapaj mohoi akuzat e kryeministrit Rama se kreu i shtetit ka shfaqur njëanshmëri në trajtimin e krizës politike në vend. "Institucioni i Presidentit të Republikës shpreh keqardhjen për adresimet e sotme me sfond politik të kryeministrit ndaj angazhimeve dhe përmbushjes së funksioneve kushtetuese të presidentit të vendit. Në asnjë rast dhe asnjë rrethanë Presidenti i Republikës nuk ka shfaqur dhe nuk ka ushtruar tagrin e tij kushtetues në mënyrë të njëanshme në favor të një pale politike apo me qëllime politike. Për fatin e trishtë të demokracisë shqiptare dhe në dëm të përpjekjeve për të konsoliduar një kulturë politike civilizuese dhe evropiane, ka qenë kryeministri i vendit, i cili ka sulmuar dhe shantazhuar në mënyrë të njëanshme dhe sistematike Insti- tucionin e Presidentit të Republikës. Kemi shprehur në vijimësi shqetësimin ndaj kësaj platforme politike për të delegjitimuar Institucionin e Presidentit të Republikës dhe kultivimit të modeleve autoritariste në raportet e ndarjes dhe balancimit të pushteteve, si një parim fondamental dhe i pamundshëm për t'u ndryshuar në Shqipëri", theksoi zëdhënësja e presidentit. Edhe gjatë një interviste televizive në "Ora News", Nishani theksoi se ishte i an- gazhuar për lehtësuar dialogun midis palëve, por se ky dialog nuk mund të bëhej për çështje teknike të zgjedhjeve të rekomanduara nga OSBE/ ODIHR. "Po. Është e vërtetë që kam marrë një iniciativë kontakti për të diskutuar në parim me aktorët kryesorë politikë në vend, duke i vënë në gatishmëri Institucionin e Presidentit për të lehtësuar komunikimin e palëve. Kjo ofertë ka qenë për të marrë një miratim në parim midis palëve", deklaroi presidenti Nishani.