Ambasada e SHBA: Senatori John McCain theksoi përpjekjet për të mundur ISIS
Senatori amerikan takon drejtuesit e shtetit dhe kreun e PD
Senatori
amerikan dhe ish- kandidati për president të SHBA- ve, John McCain takoi dje në Tiranë presidentin Nishani, kryeministrin Rama, kryeparlamentarin Meta, ministren e Mbrojtjes, Kodheli dhe kreun e opozitës, Basha. Pas takimeve, në një deklaratë të saj, ambasada amerikane njoftoi: "Senatori i SHBA, John McCain vizitoi Shqipërinë të premten, ku theksoi partneritetin ushtarak SHBA- Shqipëri, rëndësinë e reformës në drejtësi në vend, si dhe përpjekjet për të mundur ISIS". "Senatori McCain, i cili shërben si kryetar i Komitetit të Senatit për Shërbimet e Armatosura, u takua me presidentin Bujar Nishani, kryeministrin Edi Rama, kryetarin e Kuvendit Ilir Meta dhe udhëheqësin e opozitës, Lulzim Basha. Senatori McCain po ashtu vëzhgoi ushtrime ushtarake dhe u takua me anëtarë të Forcave të Armatosura të Shqipërisë", thuhet në njoftimin e ambasadës amerikane në Tiranë. Gjatë takimit me z. McCain, presidenti Nishani vuri në dukje se Shqipëria do të vazhdojë të japë kontributet e të përmbushë përgjegjësitë e saj ushtarake dhe financiare në kuadër të Aleancës së Atlantikut të Veriut. Kurse kryeparlamentari Meta shprehu mirënjohjen për partneritetin strategjik mes Shqipërisë dhe SHBA dhe nënvizoi rëndësinë e thellimit të këtij bashkëpunimi në shërbim të forcimit të kredencialeve demokratike të vendit tonë si dhe të paqes e stabilitetit në rajon. Edhe kreu i opozitës, Lulzim Basha zhvilloi një takim me senatorin John McCain. Basha e njohu senatorin me gjendjen kritike të vendit në raport me sigurinë dhe krimin e organizuar.