12 tonë kanabis të sekuestruara në Përmet, në pronësi të 4 biznesmenëve
Prokuroria e Krimeve të Rënda: Hetim zyrtarëve të policisë në Gjirokastër 2 prej tyre ushtrojnë aktivitet tregtar në Tiranë
Dy javë pas sekuestrim it të një sasie prej 12 tonësh kanabis në depon e ish- Rezervave të Shtetit, në fshatin Pagri të Përmetit, Prokuroria e Krimeve të Rënda ka ngritur dyshimet se droga ka qenë në pronësi të 4 personave. Këto dyshime ( sipas "ABC News"), kanë ardhur pasi në qeset dhe thasët e mbushur me hashash janë vendosur shenja me 4 ngjyra të ndryshme. "Çdo qese dhe thes i mbushur me hashash që peshonte nga 5 deri 35 kg, kishte nga një vijë në formën e shenjës të vendosur në ambalazhin e saj. Kjo shenjë, e vendosur në çdo qese e thes ka ngjyrë të kuqe, blu, jeshile dhe të bardhë në formën e shkronjës dhe vijëzimit", thanë hetuesit. Për këtë fakt, dyshohet se droga ishte e 4 personave të ndryshëm, 2 prej të cilëve mendohet se janë identifikuar. Sipas prokurorisë, po punohet për të gjetur prova të mjaftueshme që i lidh dy personat e identifikuar tashmë me drogën e bllokuar në Pagri të Përmetit. Burimet pohuan se dy personat e identifikuar, janë me origjinë nga Përmeti dhe Tepelena, por me banim në Tiranë, ku kanë edhe aktivitete të ndryshme tregtare. Sipas akuzës, për hetimin e kësaj dosjeje janë angazhuar dy prokurorë të Krimeve të Rënda, të cilët veç kultivuesve të drogës, po hetojnë edhe disa zyrtarë të policisë së Gjirokastrës dhe Përmetit. Të cilët, dyshohet se nuk kanë ushtruar kontrollin e duhur në këto zona, pavarësisht se nga fillimi i vitit ishte miratuar plani kombëtar për kontrollin e territorit, që të parandalohet kultivimi i kanabisit. Burimet thanë se ekzistojnë dyshime se disa efektivë të policisë edhe pranë Ministrisë së Brendshme, ishin vënë në dijeni për drogën e mbledhur nga zona e Tepelenës dhe Përmetit në depon e ish- Rezervave të Shtetit në fshatin Pagri të Përmetit. Por, pavarësisht informacion- it që dispononin, reagimi i policisë është bërë vetëm në fillim të muajt prill. Këto dyshime janë ngritur edhe pas marrjes së dëshmisë së 4 të arrestuarve, banorë të fshatit Pagri, të cilët kanë konfirmuar se që nga fillimi i muajit janar të këtij viti, pranë depos nuk janë lejuar banorët të afrohen. Pas sekuestrimit të sasisë së madhe të drogës, Policia e Shtetit ka përjashtuar disa efektivë nga radhët e saj, ndërsa disa zyrtarë të lartë janë proceduar me masa disiplinore.