Bogdani: Do testojmë futbollistët që luajnë në Shqipëri

Pas

turit të zhvilluar nëpër ekipet e Kategorisë Superiore, trajneri i 19vjecarëve të Shqipërisë, Erjon Bogdani, bëhet gati për grumbullimin e dytë në krye të kuqezinjve të vegjël. Pas atij turneu pozitiv që zhvilloi në Romë, ky grumbullim për Kombëtaren U19 vjen për të përzgjedhur më shumë lojtarët që vijnë nga futbolli shqiptar, për të ndërtuar një ekip cilësor për raundin paraeliminator për Europianin. Para këtij grumbullimi, Erjon Bogdani ka dalë në një konferencë për mediat ku ka deklaruar. "Është grumbullimi i dytë pas turneut në Romë. Është me lojtarë që luajnë në Shqipëri. Kemi 4 lojtarë që vijnë nga jashtë. Është mundësi për të parë sa më shumë lojtarë. Nga shtatori do të kemi listën e plotë për kualifikueset e tetorit. Turneu i parë që u bë në Romë ishte prej 14 lojtarësh. Kjo listë është me 21. Janë dhe 13 apo 14 lojtarë për t'u parë. Nga 55 futbollistët do të zgjedh ekipin në tetor. Mund të ketë surpriza, nëse ndokush paraqitet mirë gjatë kësaj kohe". Lojtarët vendës dhe ata që vijnë nga jashtë: "Deri tani kemi shumë shpresa, sepse ka lojtarë të mirë, që po paraqiten mirë me ekipet e tyre. Kam parë lojtarë në Itali, të cilët janë kryesorë në skuadrat ku luajnë duke qenë edhe kapitenë aty. Janë futbollistë që e kanë vetë në dorë të ardhmen. Është një moshë delikate, në ekipin tonë do të vijnë ata lojtarë që e ndiejnë se janë shqiptarë. Kam komunikuar me futbollistë që kanë luajtur me Italinë e moshave. Nëse vendosin të vijnë këtu, do të testohen si të gjithë të tjerët".