Rama: Dialog pa kushte, por pa vetingun, asnjë kompromis
Kryeministri reagoi pas përfundimit të bisedimeve me eurodeputetët "Drejtësia për Shqipërinë që duam nuk negociohet"
Kryeministri Edi Rama deklaroi dje, në përfundim të përpjekjeve për të gjetur një komunikim me opozitën, se ai është i hapur për dialog pa kushte. Në një postim të shkurtër, në rrjetin social "Facebook", ndërsa kreu i PD- së po fliste nga çadra, Rama shkroi: "Miq! Gjithnjë të hapur për dialog pa kushte. Por pa vetingun s'ka asnjë kompromis, sepse drejtësia për Shqipërinë që duam nuk negociohet". Mësohet se edhe gjatë negociatave me dy eurodeputetët, David McAllister dhe Knut Fleckenstein, Rama ka vënë si kushte votën e opozitës për vetingun dhe pastaj ka ofruar edhe shtyrje të datës së zgjedhjeve deri në një datë apo kufi të arsyeshëm. Por, gjithsesi duket se palët nuk kanë gjetur dakordësi, pasi kryeministri nuk ka pranuar të lëvizë nga ideja e tij për të mos pranuar krijimin e një qeveri teknike. Pas të gjitha negociatave dje, burime të qeverisë thanë për mediat se "zgjidhje nuk ka pasur, por zgjedhje do të ketë". Kështu me sa duket pritet që PS- ja të vijojë përgatitjet e saj për zgjedhje më 18 qershor, por nga ana tjetër nuk dihet nëse LSI dhe kreu i Kuvendit Ilir Meta do të pranojë të firmosë koalicionin me PS- në dhe Ramën pa u zgjidhur kriza me opozitën.
AKTIVITETI
Ndërkohë, para se të niste negociatat, kryeministri Rama ka pasur disa aktivitete. Ai ishte i pranishëm në ceremoninë e nisjes së punimeve për resortin turistik në Gjirin e Lalzit, në Durrës. Duke folur në ceremoni, Rama tha se, "për fat të keq, e vetmja strategji që shteti pati për turizmin për 25 vjet ishte çorganizimi i organizuar, lejimi i ndërtimeve pa leje buzë detit, madje edhe brenda detit, ngritja e strukturave hoteliere që nuk përmbushnin asnjë lloj kriteri minimal për të pritur turistë të huaj dhe jo më ndonjë strukturë hoteliere që të mund të shërbente si kartëvizitë e Shqipërisë turistike. Një turizëm i zhvilluar me gjeneratorë, me plazhe të rrethuar me tela me gjemba e gardhe dhe nga më të çuditshmit, me ujëra të zeza që derdheshin në det, me gropa septike që e kthenin rërën në një terren vegjetacioni dhe përgjithësisht, me një varfëri të jashtëzakonshme të ambicies për Shqipërinë'. "Në këto 3 vite e gjysmë nuk janë bërë mrekulli, sepse objektivisht është e pamundur të zhbësh në 3 vite e gjysmë, gjërat që janë bërë mbrapsht për çerek shekulli, por e vërteta është se sot jemi në një situatë të re, kemi një bazë të rëndësishme për të mundur të ndërtojmë më tutje turizmin e së ardhmes për Shqipërinë që duam", - tha kryeministri. "Nuk do e harroj kurrë, çfarë më ka thënë Kryeministri i Malit të Zi, kur jemi takuar herën e parë, pasi isha zgjedhur. Kur e kam pyetur për strategjinë e ndjekur për ndërtimin e strukturave cilësore me 5 yje, që e kthyen Malin e Zi në një destinacion shumë atraktiv në Mesdhe, më tha ' mos harro që unë jam kryeministër prej 20 e kusur vitesh dhe më janë dashur 10 vjet që të thyej akullin, për të sjellë strukturën e parë'", - rrëfeu Rama. "Pasi ka ardhur struktura e parë me 5 yje, është krijuar besim dhe është krijuar bindje te të tjerët që edhe Mali i Zi mund të jetë një vend ku mund të ndërtohen struktura turistike me një ambicie të tillë, sepse është çështje besimi dhe sigurisht, për një investitor, që të jetë i pari në një vend ku ka një mijë e një arsye për t'u paragjykuar, për t'u frikësuar, për t'u zmbrapsur, duhet një guxim më vete", - vijoi Rama. Pas të gjitha negociatave dje, burime të qeverisë thanë për mediat se "zgjidhje nuk ka pasur, por zgjedhje do të ketë". Kështu me sa duket pritet që PS- ja të vijojë përgatitjet e saj për zgjedhje më 18 qershor, por nga ana tjetër nuk dihet nëse LSI dhe kreu i Kuvendit Ilir Meta do të pranojë të firmosë koalicionin me PS- në dhe Ramën pa u zgjidhur kriza me opozitën.