... nga numri i shkuar
Në këtë numër kishim shumë shkrime dhe argumente. Ishte një zgjidhje e redaktorit për të përcjellë shumë argumente dhe tema në pak vend, që na ka mbetur prej pak vitesh nga “Milosao”. Mendojmë se ishte një zgjidhje e mirë. Por argumenti kryesor veç karakterit njohës, që e vlerësojmë, nuk e përmbushte idenë e një shkrimi që mund të mbante argumentin kryesor. Princ Muzhaqi dhe Gjuriç Vladani, nipat e Skënderbeut i shërbyen atij por edhe famës së tyre si ushtarë të mirë.
Shkrimi ishte kompilim dhe është e pranueshme me largësinë në kohë ku kanë jetuar personazhet, kurse pjesa e fundit ishte më interesantja dhe ajo që e lidh argumentin e shkrimit të autorit. Autori duhet vlerësuar që është shumë i dhënë pas trevës së tij dhe mundohet të gjej argumente të ndryshme, që e bëjnë vendin e tij interesant. Ndoshta duhet të ruhet nga panegjirizmi.
Agim Vinca, shkrimtari dhe studiuesi kosovar, na përcolli një vjershë të Radovan Zogoviç, këtij personazhi të njohur ballkanas, por edhe tejet të respektueshëm.
Daut Gumeni na kish sjellë një tregim, që kishte aromën e vendit të tij. Mund të zgjidhej në formë më lakonike dhe me një dialog më dinamik, kurse redaktori në vlerësimin e tij shtoi dhe argumentin e leksikut të trevës që do t’i jepte shumë fuqi tregimit. Autori duhet vlerësuar për sjelljen e argumentit të së shkuarës.
Karikaturisti Arben Meksi erdhi me disa punë të tij, duke na sjellë atë ide freskie që rrethon punën e vet, por edhe zgjidhjet shumë interesante që bën. Për redaktorin nuk ishte i lehtë botimi i tij... prej disa rrethanave fare të pakëndshme, por që përbën para- doks me vlerësimet ndërkombëtare që po merr tashmë ai kudo.
Në këtë numër, Daim Miftari, poeti shqiptar nga Maqedonia na solli krijimtarinë e tij. I ftuar nga Residenca Poeteka ai përcolli atë mënyrë poezie që bëhet sot në vendin fqinj por edhe aromën shqiptare në të. Megjithatë, duhet thënë, se prurja e tij ishte nga forma ngaqë autori përcjell frymën urbane të njohur dhe ndjesinë e Tiranës. Një pjesë e poezive kanë ardhur nga Tirana... dhe i janë dedikuar asaj. Redaktori mbeti i kënaqur gjithsesi me këtë lloj përmbajtje.