Ftesa e Nishanit, sot në orën 10: 00 takimi Rama- Basha

Negociatat mes palëve, kreu i shtetit kërkon zgjidhje dhe ofron mbështetje Kryeministri: I vonuar. Opozita: Jo fasadë

Në Presidencë para diten e sotme në orën 10: 00 do të takohen kryeministri Edi Rama dhe kreu i opozitës, Lulzim Basha. Në këtë takim do të jenë "3 palët", pasi presidenti Bujar Nishani ofroi të gjithë gatishmërinë dhe angazhimin e tij institucional në shërbim të këtij dialogu. Palët negociuan deri në arritjen e takimit pas kërkesës së z. Nishani në adresë të kryeministrit Edi Rama dhe liderit të opozitës, Lulzim Basha që të ulen në tryezën e bisedimeve për të gjetur kompromis dhe për të tejkaluar situatën në të cilën ndodhet vendi. Nishani ofron gatishmërinë dhe angazhimin për t'i shërbyer dialogut. "Presidenti i Republikës, Bujar Nishani po ndjek me shumë shqetësim përmasat që po merr kriza politike në vend. Ndaj edhe njëherë i kërkon kryeministrit të vendit dhe liderit të opozitës të ulen në tryezën e bisedimeve me vullnetin për kompromis, për të tejkaluar këtë situatë të vështirë për vendin. Presidenti Nishani ofron të gjithë gatishmërinë dhe angazhimin e tij institucional në shërbim të këtij dialogu", thuhet në njoftimin e Presidencës. Mazhoranca dhe opozita kanë shprehur dakordësinë për t'u ulur në tryezë dialogu të iniciuar nga presidenti Bujar Nishani, duke i dhënë në këtë mënyrë një mundësi zgjidhjes së krizës politike. I pari që iu përgjigj pozitivisht ftesës së presidentit ishte kryeministri Edi Rama, i cili u kujdes të shprehë shqetësimin për krizën, që sipas tij nuk është e vendit, por e Partisë Demokratike. Pak minuta më vonë në emër të koalicionit opozitar u përgjigj edhe PD- ja. Në njoftimin për mediat thuhet se opozita ka kërkuar gjithmonë dialogun e vërtetë dhe jo fasadë. Menjëherë pas deklaratës së presidentit Nishani, ku i bënte thirrje kryeministrit dhe kreut të opozitës për bisedime me vullnet për kompromis, reagoi Edi Rama. Me anë të një postimi në rrjetet sociale, kryeministri shprehet se është i gatshëm t'i përgjigjet thirrjes së presidentit për të diskutuar me Lulzim Bashën. Ndërsa e cilëson të vonuar reagimin e Nishanit. "Z. President! Edhe unë jam i shqetësuar për përmasat që po merr kriza e PD! Jam gati t'i përgjigjem thirrjes suaj kaq të vonuar e të ulem me LB", shkruan Rama në "Facebook". Pas kryeministrit Rama, i cili u shpreh i gatshëm për dialog dhe madje e cilësoi të vonuar reagimin e presidentit Nishani, edhe PD dhe aleatët e saj kanë dhënë një përgjigje pozitive. "Partia Demokratike dhe i gjithë koalicioni opozitar mirëpresin ftesën institucionale të presidentit Nishani për dialog në funksion të zgjidhjes së krizës së rëndë politike që ka mbërthyer Shqipërinë. Ndonëse shkaktari i kësaj krize, Edi Rama, me veprimet dhe qëndrimet e tij ka vendosur interesin e tij vetjak para interesave të qytetarëve shqiptarë, opozita dhe Partia Demokratike kanë kërkuar gjithmonë rrugën e dialogut të vërtetë dhe jo fasadë për t'u bashkuar përmes zgjidhjes së ofruar, në luftën kundër krimit, drogës, korrupsionit dhe kthimit të shtetit në garnizon elektoral të pushtetit, që kërcënojnë asgjë- simin e zgjedhjeve, demokracisë dhe stabilitetit përmes zgjidhjes së ofruar. Partia Demokratike dhe koalicioni opozitar rikonfirmojnë gatishmërinë e tyre, duke iu përgjigjur pozitivisht ftesës së presidentit Nishani", thuhet në deklaratën e PD- së. Z. Nishani merr përsipër të ulë në tryezë kryeministrin Rama dhe kreun e PD- së, Basha, për të zgjidhur krizën politike. Tashmë pas vullnetit të shprehur nga dy forcat kryesore politike, i mbetet presidentit që të caktojë datën kur mund të kemi një tryezë dialogu, që mund të zgjidhë situatën politike.