Zgjedhjet në Kavajë, Drejtoria e Burgjeve pezullon të gjitha lejet për të dënuarit
Zbulohet urdhri i Policisë dhe Burgjeve për të dielën
Kur
na ndajnë vetëm dy ditë nga zgjedhjet në Kavajë, gjatë të cilave opozita ka paralajmëruar një protestë, Policia edhe Drejtoria e Burgjeve kanë marrë masa për të kontribuar për rendin e sigurinë, duke pezulluar të gjitha lejet për të dënuarit, raporton "Balkanweb". Po ashtu është pezulluar edhe transferimi i të burgosurve deri pas zgjedhjeve të 18 qershorit. "Zgjedhjet në Kavajë, Drejtoria e Burgjeve pezullon të gjitha lejet për të dënuarit. Lejet, për arsye sigurie. Gjithashtu pezullohen transferimet deri pas zgjedhjeve të 18 qershorit", thuhet në një deklaratë të shkurtër të shpërndarë nga ky institucion. Sakaq, edhe Drejtoria e Përgjithshme e Policisë së Shtetit ka gati një plan masash sa më korrekt në menaxhimin e kësaj situate dhe iu ka dërguar një urdhër gjithë drejtorive vendore në qarqe që të mbajnë nën vëzhgim personat me precedentë penalë ose grupe militantësh politikë për të parë sa dhe si do të jetë organizimi i tyre drejt Kavajës. Burime nga policia thonë se, përveç thirrjes së kreut të opozitës, deri tani nuk ka informacione për organizim konkret të ndonjë tubimi. Prej disa ditësh në këtë qytet Policia e Tiranës ka çuar 60 efektivë nga secili komisariat, të cilët po monitorojnë situatën.
VËZHGUESIT
Zgjedhjet në Kavajë do të jenë nën vëzhgimin edhe të ambasadave të huaja në Shqipëri, si: ambasada hungareze, daneze, ajo e BE- së, sllovene, çeke dhe britanike. Këto ambasada kanë bërë një kërkesë në Komisionin Qendror të Zgjedhjeve për të qenë të pranishme ditën e zgjedhjeve të pjesshme në qytetin e Kavajës.