Meta: Çdo mundësi për dialog dhe normalitet
Seanca e fundit, shpërndahet Parlamenti pa kryeministrin dhe opozitën "Keqardhje për bojkotin e opozitës"
Kuvendi i Shqipërisë mbylli dje punimet për këtë mandat katërvjeçar pa praninë e opozitës. Një seancë e shkurtër dhe e fundit për këtë legjislaturë, ku deputetët patën mundësi të përshëndeten me ata që nuk do të jenë më në shtator. Për herë të fundit nga karrigia e kryetarit, pa fshehur keqardhjen për bojkotin e PD- së, Ilir Meta sqaroi se kishte synuar konsensusin, por jo gjithmonë e kishte arritur. Sipas tij, gjatë katër viteve është përpjekur t'u japë mundësi të gjithëve të kontribuojnë në dobi të debatit politik. "Të jeni të bindur - tha ai - se sjellja ime ka qenë e orientuar drejt bashkëpunimit, duke u munduar që dialogun mazhorancëopozitë ta sjell në dobi të vendit, për të rritur maksimalisht standardet", theksoi z. Meta. Pas votimit të ligjeve të fundit, kryetari i Kuvendit, Ilir Meta përmendi se reforma në drejtësi ishte një nga punët më të mira që ka realizuar ky Parlament dhe shprehu keqardhjen për mungesën e deputetëve të djathtë. Miratimi i ligjit për dekriminalizimin dhe reforma në drejtësi janë konsideruar si pikat e forta të këtij 4- vjeçari, ndërsa Meta ka shprehur keqardhjen për reformën e lënë në mes të drejtësisë, por edhe të Kodit Zgjedhor. "Besoj se kush më shumë e kush më pak, sipas mundësive apo dhe axhendave politike, u përpoqëm t'u japim qytetarëve një paketë të rëndësishme legjislative, që do t'i shërbejë hapjes së negociatave për anëtarësimin e vendit në BE. Dua të veçoj në mënyrë të jashtëzakonshme miratimin e reformës territoriale administrative, e cila i dha peshën reale pushtetit vendor dhe përgjegjësitë për një menaxhim të mirë të burimeve njerëzore, ekonomike dhe natyrore. Reformën kushtetuese dhe paketën e ligjeve prioritare për sistemin e drejtësisë, si kryereforma e kësaj legjislature, themeli i shëndoshjes së shoqërisë, shtetit të së drejtës, ekonomisë, sigurisë së jetës, pronës dhe rendit në vend; reformë që u
miratua me konsensus dhe me votat e të gjithë deputetëve të Kuvendit. Megjithatë, do të duhej që ky Kuvend të kishte përfunduar reformën zgjedhore dhe të kishte miratuar ndryshimet e kërkuara Kodin Zgjedhor për garantimin e zgjedhjeve të lira", deklaroi z. Meta. Ai shprehu keqardhje për bojkotin e opozitës, por nuk la pa përshëndetur Sali Berishën dhe Edmond Spahon. "Jam
i keqardhur të shikoj në këtë seancë përmbyllëse mungesën e kolegëve tanë të opozitës, megjithatë kur ka vullnet, ka mundësi për të rikthyer normalitetin në Kuvend dhe dialogun politik për çështjet dhe sfidat që duhet t'i përballojmë së bashku. Faleminderit të gjithëve dhe me këtë deklaroj seancën dhe këtë legjislaturë të mbyllur!", u shpreh kreu i Kuvendit. Në datën 24 korrik Ilir Meta do
të bëjë betimin si President i Republikës. Ndërkohë që zgjedhjet parlamentare janë dekretuar për t'u zhvilluar në datën 18 qershor. Në mbyllje të seancës të fundit për këtë legjislaturë, Ilir Meta shtroi koktejl për deputetët. Duke lënë pas sherret e ashpra të 4 viteve, deputetë të PS, LSI e PDIU LSI, ata që janë dhe nuk janë në listat e ardhshme festuan në pritjen e lamtumirës që Ilir Meta kishte shtruar për ta.