Tensionet në Shkup, do të vriteshin tre shqiptarë
"INA": Qëllimi i sulmit, që Maqedonia të përfshihej në konflikt ndëretnik "Do fajësohej turma e acaruar"
Tre deputetë shqiptarë ishin objektiv i sul mit që ndodhi në Parlamentin e Maqedonisë pak ditë më parë. Tre politikanët duhej të eliminoheshin gjatë vërshimit të protestuesve, për të mbuluar "gjurmët" e organizatorëve të këtij atentati. Sipas agjencisë së lajmeve "INA", "një ish- funksionar i Qeverisë maqedonase ka planifikuar, me ndihmën e shërbimeve të një vendi fqinj, eliminimin e 3 deputetëve shqiptarë të Parlamentit të vendit". Sipas saj, synimi ishte që Maqedonia të përfshihej në tensione të ashpra ndëretnike e të krijoheshin kushtet për shpalljen e gjendjes së jashtëzakonshme. Plani do të ishte realizuar në një protestë gjithëpopullore, e cila do të përdorej për të mbuluar sulmin, i cili do të dukej si spontan, e kështu, ajo që do të akuzohej në fund do të ishte turma e acaruar. Një skenar për likuidim, gjithmonë sipas së njëjtës agjenci, ka qenë nata e 27 prillit, kur u dhunua e mbeti i lënduar rëndë kryetari i Aleancës për Shqiptarët, Ziadin Sela. 12 individë të dyshuar për ngjarjen e ndodhur në Parlamentin e Maqedonisë u ndaluan së fundi nga poli- cia. Sipas Ministrisë së Brendshme maqedonase, numri i atyre që përballen me akuza penale për incidentin, ku u plagosën më shumë se 100 vetë, është 20. Njëri prej të ndaluarve për rrahjen e deputetit Ziadin Sela është identifikuar si Toni Trajkovski. Prangosja e tij u krye në Kumanovë nga inspektorë civilë shqiptarë. Ndërkohë situata politike në Maqedoni paraqitet e qetë dhe gjithnjë e më pranë zgjidhjes së krizës. Konfirmimi vjen edhe nga Brukseli, i cili ka ftuar zyrtarisht kryetarin e ri të Parlamentit të Maqedonisë, Talat Xhaferin. Me ftesë të zyrtarëve të lartë të Bashkimit Evropian, Xhaferi do të zhvillojë takime me eurokomisionerin për Zgjerim Johanes Han dhe Përfaqësuesen e Lartë për Çështje të Jashtme dhe Siguri Politike të Bashkimit Evropian, Federika Mogerini. Gjatë vizitës në Bruksel, Xhaferi do të takohet edhe me kryetarin e Parlamentit Evropian, Antonio Tajani, por edhe me eurodeputetët Ivo Vajgel, Eduard Kukan dhe Knut Fleckenstein. Ndërkohë, mediat greke kanë shkruar dje se Bashkimi Europian ka ngritur një zyrë emergjence në Maqedoni. Sipas tyre, Komisioni Europian, duke parë gjendjen në ish- Republikën Jugosllave të Maqedonisë, ka krijuar ditët e fundit në Shkup Zyrën e Menaxhimit të Informacionit, me përfaqësimin e gjithë vendeve anëtare, midis të cilave është edhe Greqia. "Eleftheros Tipos" dhe "Ethnos" shkruajnë se, qëllimi i kësaj zyre është të ndjekë nga afër zhvillimet në Shkup dhe të marrë masa emergjente për
përballimin e situatave të tejskajshme. Ajo që shqetëson zyrtarët grekë është rrëzimi i qeverisë aktuale dhe fundosja e vendit në një krizë të zgjatur ose në luftë civile që mund të çojë edhe në zhvendosjen e popullsive. Sipas "Ethnos", Greqia ka filluar të marrë masa në kufijtë e saj me fqinjin verior para incidenteve që ndodhën në parlamentin e vendit. Në mesin e muajit të kaluar, ministri grek i Rendit, Nikos Toskas ka biseduar me homologun e tij në Beograd, Nebojsha Stefanovic për koordinimin e veprimeve në rast të një destabilizimi të mundshëm të Shkupit. Masat që ka marrë Athina në rast të këtij skenari që askush nuk e do, përfshijnë përqendrimin e popullatës që do të shpërngulet në kufijtë me ish- Republikën Jugosllave pranë Kilkizit, ku do të krijohet një pikë që do të shërbejë për pritjen, regjistrimin dhe identifikimin e atyre që do të hyjnë për të kërkuar strehim në territorin grek, ku do të qëndrojnë deri në zbutjen e konfliktit të mundshëm.