Arrestohet 26- vjeçarja, tentoi të vriste me sëpatë bashkëjetuesin
Historia e Vjollca Shkëmbit, ja si e shitën dhe e martuan 4 herë në Maqedoni 44- vjeçari s'pranoi të jetonte me fëmijët e së resë
Një 26- vjeçare nga Ko rça ka përfunduar në pranga, pasi akuzohet se ka tentuar që të vrasë me sëpatë bashkëjetuesin e saj. Bëhet fjalë për Vjollca Shkëmbin, banuese në Pojan- Maliq, e cila në janar të vitit të kaluar deklaroi se ishte rrëmbyer dhe shitur katër herë në Maqedoni dhe se më pas e kishin kërcënuar me jetë që të mos tregonte asgjë se çfarë i kishin bërë. Burime zyrtare nga Drejtoria e Policisë së Qarkut të Korçës dje bënë me dije se ka qenë ka qenë një telefonatë e bërë nga një shtetase, që bëri të mundur parandalimin e krimit. Mësohet se më datë 04.05.2017, në numrin 129 të Policisë ka telefonuar një shtetase, e cila ka kërkuar ndihmën e policisë, pasi në fshatin Pojan, në banesën e Vjollca Shkëmbit kishte një konflikt. Ka qenë pikërisht fqinja e 26vjeçares, e cila e alarmuar nga sherri që ka dëgjuar dhe bërtiturat e të dëmtuarit ka sinjalizuar policinë se diçka po ndodhte. Menjëherë pas sinjalizimit, blutë kanë shkuar në vendngjarje dhe kanë nisur hetimet. Nga kryerja e veprimeve hetimore paraprake rezultoi se e reja pas një konflikti për motive të dobëta ka tentuar të vrasë me mjet të mprehtë ( sëpatë), bashkëjetuesin e saj shtetasin N. K., 44 vjeç, banues në Sheqeras- Maliq, të cilit i ka shkaktuar plagë të lehta në trup. I plagosuri pas marrjes së mjekimit në spital është kthyer në banesën e tij. Ndërsa, hetuesit e çështjes gjetën dhe sekuestruan në cilësinë e provës materiale sëpatën me të cilën ishte goditur 44- vjeçari. Po të njëjtat burime pohuan se çifti është grindur për shkak të dy fëmijëve të 26- vjeçares, të cilët kanë ardhur në jetë nga partnerët e saj të mëparshëm. 44- vjeçari ka refuzuar që në bashkëjetesën e tyre të përfshiheshin edhe fëmijët e Vjollcës. Kjo e fundit pas mosmarrëveshjeve ishte kthyer në banesën e prindërve të saj, në fshatin Pojan. Pasi kthimit në Pojan, grindja mes çiftit është agravuar. Në sherr e sipër, Vjollca Shkëmbi ka marrë sëpatën dhe ka nisur të godasë bashkëjetuesin e saj. Ajo u kap në flagrancë nga policia për veprën penale: "Vrasja për shkak të marrëdhënieve familjare" mbetur në tentativë. Materialet në ngarkim të autores së krimit i kaluan për hetime të mëtejshme Prokurorisë të Krimeve të Rënda në Tiranë.
HISTORIA E AUTORES
Më 4 janar të vitit 2016, Vjollca Shkëmbi deklaroi në një intervistë për "GSH" se, "jam shitur 4 herë në Maqedoni te burra mbi 50 vjeç kundrejt shumës 400 euro dhe më pas dhunohesha fizikisht nëse nuk pranoja të martohesha me personin e radhës. Herën e fundit më kanë detyruar të martohem me një burrë 75 vjeç. Urim Qazimaj së bashku me disa persona të tjerë kryenin celebrimin me dokumente të falsifikuara që personi me të cilin do të martohesha të besonte. Pasi martohesha, ikja nga Maqedonia dhe kthehesha nga mali në Shqipëri". Vjollca Shkëmbi nga fshati Pojan tregoi dramën e saj. Ajo pranoi se është rrëmbyer dhe është shitur në vendin fqinj nga bashkëfshatari i saj 23- vjeçar, Urim Qazimaj dhe daja i këtij të fundit, Mersin Myrtollari. Ndërkohë, Vjollca Shkëmbi sqaroi se është detyruar të shtirej dhe të hedhë poshtë akuzat e policisë ( më 25 dhjetor të vitit 2015) ndaj dy personave në fjalë, pasi ata e kanë dhunuar dhe e kanë kërcënuar me jetë. Jo vetëm kaq, por ajo u shpreh se është mbajtur një javë peng nga babai i djalit që e shiste në Maqedoni. "Qazim Qazimaj më ka thirrur në banesën e tij dhe më ka mbajtur peng. Ai më ka kërkuar duke më kërcënuar që të hidhja poshtë të gjitha akuzat ndaj djalit të tij, Urimit, me qëllim që të lihej i lirë nga policia", tha Vjollca Shkëmbi.