Rama- Basha tri orë kokë më kokë, arrihet marrëveshja
Tri kamera që i regjistrojnë, Rama e Basha detyrohen të ndërrojnë sallën pas një ore Shtrëngojnë duart si dy miq: Jemi 100% dakord
Edi Rama dhe Lulzim Basha, tri orë me radhë, me kafen dhe ujin përpara, diskutuan pa debate dhe me tone të qeta deri në orët e para të mëngjesit të sotëm rrugët e zgjidhjes së krizës politike. Pas orëve të gjata, ata mundën të arrijnë marrëveshjen e shumëpritur, teksa u shfaqën të qeshur në publik, duke pohuan se janë dakord 100 për qind. Ata shtrënguan duart si dy miq. Lulzim Basha pas përfundimit të takimit deklaroi se është arritur marrëveshja, e cila bazohet te paketa e SHBA- ve dhe BE- së. "Kemi një marrëveshje të bazuar te paketa ' McAllister+'. Marrëveshja do të detajohet në 24 orët e ardhshme, e pastaj do kemi një deklaratë të plotë për detajet". Ndërkohë që Edi Rama deklaroi: "Jam dakord 100% me kryetarin e PD- së". Më herët, dy kundërshtarët politikë u "përplasën" në hyrje të kryesisë së Kuvendit. Një episod interesant u pa ende pa filluar tryeza politike, pikërisht në kohën kur kryetari i opozitës po jepte një deklaratë për mediat para portës së kryesisë së Kuvendit. Pak pasi Basha nisi të fliste, në anën e tij të majtë u shfaq kryeministri Rama, bashkë me Sekretarin e Përgjithshëm të Kryeministrisë Agaçi, duke ardhur në këmbë nga selia e qeverisë. Pasi ndenji disa sekonda pak metra larg Bashës duke vështruar nga ai, Rama është afruar te supi i shefit të opozitës dhe i ka thënë me zë të ulët ' erdha unë, eja tani'. ' Shko, shko, se aty kemi punë', i është përgjigjur Basha, pa e ndërprerë komunikimin me gazetarët. Prononcimi i Bashës lidhej me një intervistë të tij për gazetën austriake "Der Standard", e cila
shkaktoi zhurmë të madhe për shkak të një deklarate për të inkriminuarit nga komuniteti katolik të futur në listat e Partisë Socialiste nga Rama. Kreu i PD- së Basha deklaroi se e vlerëson komunitetin katolik dhe se zhurma për deklaratën e tij e ka burimin te mjetet e propagandës së pushtetit. Më pas, palët hynë në ambientet e kryesisë së Kuvendit. Pas rreth 120 minutash takim me kryetarët e partive par- lamentare, Edi Rama i kërkoi Lulzim Bashës që të vijonin një takim kokë më kokë mes tyre. Kjo detyroi tetë kryetarë të tjerë të grupeve parlamentare që të lënë sallën "Pjetër Arbnori" ku po zhvillohej takimi, për të lënë vetëm për vetëm Ramën dhe Bashën. Kjo sallë që përdoret për mbledhjet e Konferencës së Kryetarëve dhe Komisionit të Ekonomisë, është e pajisur me tri kamera të vendosura në mur, të cilat bëjnë regjistrimin e mbledhjeve. Dyshimet që takimi i tyre kokë më kokë mund të regjistrohej, ka bërë që ata pas rreth 60 minutash, të largohen nga kjo sallë, për t'u spostuar në sallën e madhe, ku dikur zhvillonte mbledhjet Grupi Parlamentar i PD- së. Ky takim erdhi pasi aleatët e PD- së, kreu i PR- së Fatmir Mediu dhe kreu i PAA- së Agron Duka iniciuan tryezën e mbrëmshme pozitë- opozitë për arritjen e një marrëveshjeje. Burime brenda takimit, bëjnë me dije se kryeministri Rama nuk tërhiqet nga mbajtja e zgjedhjeve në 18 qershor. Të njëjtat burime shprehen se, me shumë vështirësi, Rama mund të shkojë deri në 2 korrik, por jo më tej. Të njëjtin qëndrim kreu i qeverisë mbajti edhe me disa pika të rëndësishme të paketës "McAllister plus". Rama nuk pranon futjen në qeveri të 4 ministrave të propozuar nga opozita, duke lëshuar vetëm 2 ministra pa portofol. Një tjetër detaj jo pak i rëndësishëm që mësohet nga kjo tryezë është se Rama është lënë vetëm edhe nga aleatët e tij në qeveri, LSI dhe PDIU. Përfaqësuesit e këtyre dy partive, Petrit Vasili dhe Shpëtim Idrizi, janë shprehur se mbështesin pa asnjë rezervë paketën "McAllister plus". Dy personat kyç që ndërmjetësuan tryezën e dialogut mes partive parlamentare, Fatmir Mediu dhe Agron Duka, thanë pas takimit se palët janë afruar në qëndrimet e tyre, por se diskutimi kryesor mbetet te data e zgjedhjeve. "Qartësisht në tryezë kemi pozicione të përafërta, por dhe pozicione të ndryshme. Opozita në mënyrë të qartë ka theksuar se ka miratuar pa asnjë kusht paketën nga Yee dhe ambasadori Lu. Kjo paketë është ' McAllister' dhe propozimet e tjera të integruara. Po ashtu kemi theksuar se nuk kemi debat për asnjë çështje. Kemi parë një vullnet të mirë nga pjesa tjetër e partive politike, me përjashtim të zotit Rama, për ta parë si një paketë funksionale. Opozita është e gatshme ta implementojë këtë paketë nga pika e parë tek e fundit. Që nesër të mblidhet parlamenti, të bëhen ndryshimet ligjore të domosdoshme për ta bërë të implementueshme këtë paketë. Ky është qëndrimi i opozitës në mënyrë që t'u japim mundësi shqiptarëve që të shkojnë në një proces zgjedhor që nuk komandohet nga politika, por nga vota e tyre. Nuk ka asnjë qëndrim dhe as një qëllim tjetër", - tha z. Mediu.