Shefat e shërbimit në spitale, si do vlerësohen nga komisioni
Kriteret e plota/ Kandidatët të paraqesin projekt për zhvillimin e shërbimit Përzgjedhja me konkurs, ja procedura
Dalin kriteret, mbi ba zën e të cilave do të vlerësohen kandidatët konkurrues për shefa shërbimi në qendra spitalore universitare. "Gazeta Shqiptare" publikon sot tabelën e plotë me kushtet të cilave do t'u referohet komisioni për përzgjedhjen e fituesve. Një javë më parë, Këshilli i Ministrave miratoi vendimin, ku përcaktohej procedura e përzgjedhjes dhe emërimit të tyre, sipas të cilit, drejtuesi i shërbimit do të përzgjidhet në bazë konkurrimi. Procedurat për përzgjedhjen e drejtuesit të shërbimit shëndetësor universitar do të nisin nga rektorati i Universitetit Mjekësor të Tiranës, ndërkohë që përzgjedhja e kandidaturave do të bëhet nga një komision i posaçëm, i ngritur me urdhër të përbashkët të Ministrisë së Shëndetësisë dhe Ministrisë së Arsimit dhe Sportit, i cili ka në përbërje të tij një përfaqësues nga Rektorati, Dekanati i IAL- së, struktura shëndetësore universitare, MAS dhe MSH. Pas shpalljes së datave, ky komision do të publikojë dhe kriteret e vlerësimit të çdo dosjeje.
KONKURRIMI
Sipas vendimit të qeverisë, kandidatët për drejtues të shërbimeve do të aplikojnë për pozicionin përkatës për një periudhë prej 15 ditësh kalendarike, duke nisur nga 1 muaj para datës së konkur- rimit. Kërkesa e tyre duhet të shoqërohet me curriculum vitae, vetëdeklarimet bazuar në legjislacionin në fuqi, kopje të noterizuar të dokumentacionit përkatës provues të plotësimit të kritereve dhe të kartës së identitetit, si dhe projektin për zhvillimin e shërbimit. Kjo kërkesë dorëzohet pranë zyrës së burimeve njerëzore të fakultetit, pjesë e të cilit është shërbimi ku do të konkurrojnë. Pas kësaj faze, kandidatët do të paraqiten ditën e konkurrimit për të kryer intervistën me komisionin, e cila ka për qëllim prezantimin e projektit të kandidatit për zhvillimin dhe drejtimin e shërbimit. Projekti duhet të paraqesë të dhëna dhe produkte konkrete të matshme, të cilat do të shërbejnë më pas si bazë për vlerësimin e punës së drejtuesit të ardhshëm të shërbimit që i ka paraqitur ato. Komisioni do të vlerësojë projektin e paraqitur, ndërkohë që angazhimet e paraqitura nga kandidati
në projekt do të bëhen pjesë e kontratës që kandidati lidh nëse ai shpallet fitues me strukturën shëndetësore universitare. Do të jetë pikërisht ky komision që do të bëjë renditjen e kandidaturave që aplikojnë për postin e drejtuesit të shërbimit shëndetësor universitar, ndërsa emërimi do të bëhet nga MAS dhe MSH. Sipas vendimit të qeverisë, kandidati fitues do
të lidhë kontratën me drejtuesin e strukturës shëndetësore universitare, pjesë e së cilës është shërbimi përkatës. Nëse ai vjen nga jashtë strukturave të IAL- së, fiton automatikisht edhe pozicionin e pedagogut me kohë të plotë, me kontratë me kohë të pacaktuar pranë IAL- së përkatëse. Drejtuesi i shërbimit drejton shërbimin për 4 vjet, me të drejtë rikandidimi.