Marrëveshja Rama- Basha, zgjedhjet në 25 qershor

Zbardhen detajet e paktit dypalësh, PD merr zv/ kryeministrin e 6 ministra teknikë Nuk ka koalicione parazgjedhore, regjistrimi para 26 majit

Marrëveshja shtrihet edhe përtej zgjedhjeve të përgjithshme, sepse Rama dhe Basha janë dakordësuar që në sesionin e ri parlamentar të miratojnë reformën kushtetuese e atë zgjedhore, përfshi votimin e numërimit elektronik në zgjedhjet pasardhëse.

Opozita ka mundur të sigurojë pas 90 ditësh qëndresë në "çadrën e lirisë", shtyrjen e zgjedhjeve dhe gjysmën e qeverisë. Lulzim Basha dhe Edi Rama e firmosën paktin e përbashkët dje pas 5 orësh qëndrimi kokë më kokë në ambientet e Pallatit të Kongreseve. Marrëveshja shtyn datën e zgjedhjeve nga 18 qershori në 25 qershor, ndërsa i jep opozitës edhe postin e zv/ kryeministrit si dhe postet e 6 ministrave të konsideruar teknikë. Marrëveshja prej rreth 4 faqesh iu dërgua medias nga Partia Demokratike dhe PS- ja në të njëjtën kohë. Marrëveshja ndahet në gjashtë sektorë: zgjedhjet, qeveria, parlamenti, organet e pavarura, reformat dhe masa të tjera. Në dokumentin 4- faqësh bie në sy çka ishte paralajmëruar, shtyrja e datës së zgjedhjeve me një javë. Ato do mbahen më 25 qershor 2017, njëkohësisht me zgjedhjet e pjesshme të Kavajës, ndërsa partitë e opozitës do regjistrohen brenda datës 26 maj. Duket se opozita nuk është tërhequr nga identifikimi elektronik në zgjedhje, por mazhoranca i ka dhënë më shumë hapësirë në qeveri dhe institucione të tjera qendrore. Kështu, opozita do ketë të drejtën e propozimit të 6 ministrave, i Brendshëm, i Arsimit, i Shëndetësisë, Mirëqenies Sociale, Financave e Drejtësisë dhe të një zv. kryeministri, të gjithë persona teknikë. Sipas marrëveshjes, opozita ka të drejtë të propozojë edhe emrat për disa prej drejtorive më të rëndësishme, e ALUIZNI- t, e Hipotekave, e Burgjeve, e Agjencisë së Zhvillimit Bujqësor e Rural. Opozita do propozojë edhe krerët e dy organeve të pavarura, KQZ e Avokatin e Popullit. Nga ana tjetër, opozita do kthehet në Kuvend e do votojë në një seancë të jashtëzakonshme organet e vetingut dhe një sërë ndryshimesh në legjislacion, që do garantojnë zgjedhjet e lira e të ndershme. Dekriminalizimi dhe shmangia e përdorimit të administratës publike në zgjedhje janë dy momentet e tjera të fiksuara në marrëveshje.

Ministri i Financave, Arben Ahmetaj, i cili do të duhet të lërë detyrën pas marrëveshjes ' Rama- Basha' për t'u zëvendësuar nga një ministër teknik, shpreh falënderime për kryeministrin dhe bashkëpunëtorët e tij në këto 3 vite e gjysmë qeverisje. Sipas tij, kjo qeveri e nxori vendin nga rrënimi.