Incident në SHBA, qëllohet me vezë Vlora Çitaku: Je kriminele me taka
Aktivistja e Vetëvendosjes sulmon ambasadoren e Kosovës
Ambasadorja
e Kos ovës, Vlora Çitaku ka përjetuar një situatë mjaft të sikletshme, kur gjatë fjalës së saj në një takim me të rinj të Universitetit të Denverit, është qëlluar me vezë. Në prani të ishambasadorit Kriss Hill, diplomatja është akuzuar nga një aktiviste e lëvizjes Vetëvendosje, e cila e ka quajtur "kriminele me taka". Diplomatja ka qenë e ftuar të flasë lidhur me sfidat me të cilat përballet shteti i ri në rajonin e Ballkanit. Aktivistja e pyeti ambasadoren lidhur me situatën në Kosovë, mungesën e vendeve të punës, shëndetësinë problematike, situatën e keqe në arsim, të drejtat e cenuara të komunitetit LGBTI etj. Blerta Avdyli e Vetëvendosjes nuk ka duruar por ka nisur replikat me Çitakun. E vënë në siklet, diplomatja i ka thënë se "ti je dukshëm një aktiviste politike, por unë nuk jam". Kjo e ka nervozuar aktivisten, e cila ka nisur të bërtasë "shame on you", dhe i ka qëlluar Çitakun dhe Kriss Hillin me dy vezë të prishura. Në lidhje me ngjarjen, Blerta Avdili ka shpjeguar arsyet e saj, teksa thotë se vezët synonte t'ia jepte dhuratë, por përgjigjja e saj e irritoi. "Ka vite që jam e indinjuar thellësisht me situatën e krijuar nga regjimi autoritar i instaluar në Kosovë nga partitë në pushtet dhe njerëzit e dala nga këto parti, si ambasadorja Vlora Çitaku. Partitë e pushteti në Kosovë dhe njerëzit e dalë prej tyre e kanë lënë popullin tim me një prej sistemeve më të degraduara shëndetësore dhe arsimore në botë. Populli në Kosovë jeton si në një burg nën qiell të hapur nën një dhunë të vazhdueshme sistemike", - ka thënë ajo. Në aktivitetin që u mbajt të mërkurën në Universitetin e Denverit, në Kolorado, SHBA, Blerta i ka drejtuar disa pyetje Vlora Çitakut, lidhur më korrupsionin në Kosovë dhe degradimin e përgjithshëm që ka sjellë pushteti që ajo përfaqëson. Gjithashtu, e ka quajtur përgjegjës këtë pushtet dhe përfaqësuesit e tij, përfshirë Vlora Çitakun, për persekutimin e vazhdueshëm të aktivistëve të opozitës me prova dhe raste gjyqësore të montuara, që kanë çuar deri te vrasja në burg e aktivistit Astrit Dehari. "I njëjti pushtet ka refuzuar një hetim ndërkombëtar mbi këtë vrasje. Vlora Çitaku u përpoq ta relativizonte situatën, duke mos qenë e sinqertë para publikut dhe duke u përpjekur sërish që ta mbulonte krimin e pushtetit që ajo përfaqëson", - shpjegoi Blerta Avdili në një deklaratë publike.