Kosovë, 6 parti serbe në zgjedhje: Do bojkotojmë formimin e ushtrisë
Qeveria e Serbisë: Bashkojuni Listës Serbe
Projekti
i Presidentit të Kosovës, Hashim Thaçi, për formimin e Ushtrisë së Kosovës ka hasur në shumë vështirësi. Fillimisht, ai u kritikua nga ndërkombëtarët, për shkak të synimit të tij për ta realizuar qëllimin edhe me shkelje kushtetuese. Por natyrisht që, më shumë e frikësuar dhe e prekur nga një hap i tillë është Serbia, e cila është përpjekur në të gjitha mënyrat që ta pengojë. Por duket se shteti fqinj ka gjetur një mënyrë për të bojkotuar krijimin e ushtrisë, kjo nëpërmjet deputetëve serbë në parlament. Ndryshe nga zgjedhjet e kaluara, këtë vit në zgjedhjet e 11 qershorit në Kosovë do të marrin pjesë 6 subjekte politike serbe, mes tyre 4 parti, 1 koalicion dhe 1 iniciativë qytetare. Subjektet serbe që garojnë në këto zgjedhje janë Lista Serbe e udhëhequr nga Sllavko Simic, Partia Demokratike Progresiste e drejtuar nga Nenad Rashic, Partia Liberale - SLS e Sllobodan Petrovic, Partia Përparimtare e Kosovës, që udhëhiqet nga Aleksandër Grujic, koalicioni Partia e Serbëve të Kosovës e Aleksandër Jabllanovic dhe iniciativa qytetare, Lidhja Patriotike Serbe. Edhe pse të përçarë mes njëri- tjetrit, serbët e Kosovës kanë vetëm një objektiv të qartë, që nuk ngurrojnë ta shprehin: të pengojnë formimin e Ushtrisë së Kosovës. Të dielën, liderët serbë kanë zhvilluar një takim me zyrtarë të Listës Serbe dhe pas takimit, të gjithë u shfaqën të bindur se vetëm Lista Serbe mund ta ndalojë formimin e ushtrisë së Kosovës dhe t'u sigurojë serbëve një jetë më të mirë. "Deputetët e Listës Serbe mund ta parandalojnë formimin e Ushtrisë së Kosovës. Kur ju dëgjoni kandidatë për kryeministër si Haradinaj, i cili dëshiron të vijë deri në Nish, atëherë duhet që serbët të mos i lejojnë këto deklarata dhe formimin e ushtrisë", - tha pas takimit Aleksandar Vulin, ministër i Punës dhe Mirëqenies Sociale. Vulin është shprehur i bindur se vetëm me Listën Serbe në
Kuvend zëri i serbëve do të mund të dëgjohej. Ai ka bërë të ditur se qeveria e Serbisë në mënyrë unanime do ta përkrahë këtë subjekt për zgjedhjet e 11 qershorit. Kurse, Slavko Simic ka thënë se ata do të synojnë që serbëve në Kosovë t'u krijohen kushte më të mira dhe stabilitet. "Njerëzit duhet ta shohin seriozitetin dhe legjitimitetin e njerëzve në Listën Serbe", - tha Simic.