Petro Koçi: Votat tona, për PS Gjinushi: Bëjmë llogaritë tona
23 aleatët e PS çregjistrohen nga zgjedhjet
parti politike me kryetarët e tyre zhvilluan dje një takim me kryeministrin Edi Rama dhe sekretarin për koalicionet në PS, Musa Ulqini. Pas këtij takimi, ata vendosën të çregjistrohen në KQZ si subjekte për zgjedhjet e 25 qershorit. "Duke pasur parasysh që nuk janë regjistruar koalicione, atëherë ne kemi vendosur që të mbështesim kudo Partinë Socialiste, në mënyrë që ajo të sigurojë 71 mandate, ose më shumë, në zgjedhjet që bëhen në 25 qershor; që do të thotë se çdo votë e hedhur gabimisht për subjektet të tjera, që janë të spektrit të majtë politik, dëmtojnë fitoren e së majtës socialiste në zgjedhjet në 25 qershorit", deklaroi dje kreu i PSV' 91, Petro Koçi. Bashkë me të kanë qenë në këtë takim kreu i PSV Gjergji Koja, kreu i Unitetit Kombëtar Idajet Beqiri etj. "Nëse do të kishim koalicione të regjistruara, atëherë çdo votë e hedhur për partitë e vogla do të ushqente fitoren e të gjithë koalicionit. Por në rrethanat e krijuara, çdo votë e hedhur pikërisht për këto parti e dëmton objektivin e të majtës socialiste", tha Koja. Por, kundër këtij vendimi janë dy aleatët e tjerë, Paskal Milo i PDS- së dhe kreu i PSD- së, Skënder Gjinushi. "Këtë herë nuk do të gabojmë. Ne dimë të bëjmë llogaritë tona. Do vazhdojmë garën më me forcë. I bëj thirrje edhe Edi Ramës t'i bëjë llogaritë mirë, sepse i duhet absolutisht bashkëpunimi me PSD, pavarësisht presionit që ka nga të vetët", tha Gjinushi. "PS nuk mund t'i fitojë e vetme zgjedhjet dhe duhen patjetër disa mandate që fitohen me dinjitet nga PSD për të kaluar 71", tha ai, duke sqaruar se PD i strehoi aleatët, ndërsa PS gaboi.