Vrau kushëririn në Greqi, kërkohet burgim i përjetshëm për Denis Zakën

Vladimir Murrizi u masakrua me 25 thika në trup

Prokuroria e Krimeve të Rënda kërkoi dënimin me burgim të përjetshëm për Denis Zakën, i cili akuzohet se vrau me thikë kushëririn e tij, pasi ky i fundit e kishte ofenduar nga gruaja me fjalët "Gruaja jote është k…". Ngjarja e rëndë u shënua më 3 gusht të vitit të shkuar, në një fshat të Larisës, ku viktimë mbeti Vladimir Murrizi. Nga hetimet e prokurorisë, ka rezultuar se viktima është qëlluar mizorisht të paktën 25 herë me thikë nga Zaka, plagë të cilat i ka marrë në zemër dhe në fyt. Ditën e djeshme, Zaka doli para Gjykatës së Krimeve të Rënda dhe nuk bëri asnjë koment për dënimin e kërkuar ndaj tij. Më herët, Zaka ka treguar para hetuesve se pasi kishte kryer krimin e rëndë, trupin e pajetë të kushëririt të tij e kishte groposur në një përrua. Po ashtu, 26- vjeçari nga Lushnja ka rrëfyer më tej, se pasi e kishte groposur viktimën, sipër dheut i kishte hedhur edhe disa monedha që kishte pasur me vete. "Kushëririn e vrava se më shau gruan. Pimë alkool të dy në lokal. Pastaj u nisëm të vidhnim një frezë. Rrugës debatuam. Nuk durova dot sharjet ndaj gruas dhe e godita me thikë. Vladimiri ra përtokë dhe ishte i mbuluar nga gjaku. Nuk reagoi më. Kisha frikë nga arrestimi, nuk dija ç'të bëja, ndaj vendosa ta fshihja kufomën. E groposa buzë një përroi", - ka thënë Zaka para hetuesve. Fillimisht, i riu nuk e ka pranuar të kishte lidhje me zhdukjen e kushëririt të tij, dhe se familjarëve të viktimës, të cilët denoncuan dhe zhdukjen, u kishte thënë se Vladimiri ishte larguar në një fshat tjetër të Greqisë për të punuar. Më pas, ai ngriti pretendimin se ishte vrarë nga persona të tjerë, teksa vidhte një korrëse bari. 26- vjeçari u arrestua verën e vitit të shkuar nga Policia e Fierit, pasi Zaka ishte kthyer në banesën e tij pasi kishte kryer vrasjen në Greqi. Ndaj tij rëndon akuza e "Vrasjes për shkak të marrëdhënieve familjare".