Ministri i ri i Brendshëm takon drejtuesit e policisë: Do mbani përgjegjësi për drogën
Demiraj: Kush përfshihet në fushata, do mbajë përgjegjësi penale
Ministri
i ri i Punëve të Brendshme, Dri tan Demiraj zhvilloi dje një takim me drejtuesit kryesorë të Policisë së Shtetit, ku përcolli disa mesazhe dhe shpalosi prioritetet kryesore të mandatit të tij. Gjatë takimit, ai ka theksuar për garantimin e një procesi zgjedhor me standarde të larta profesionale nga ana e Policisë së Shtetit. Ministri nënvizoi se cilido person me uniformë dhe pa uniformë pjesë e strukturave të Ministrisë së Punëve të Brendshme, që përfshihet në fushata duke shkelur parimet kushtetuese dhe ligjet që garantojnë procesin zgjedhor, do të mbajë përgjegjësi administrative dhe penale me largim nga detyra dhe ndjekje penale. "Shpërdorimi i autoritetit policor për të influencuar në mbështetjen e një partie politike është vepër penale dhe dënohet me burgim", - u shpreh ai. Ai foli edhe për ashpërsimin e luftës kundër kanabisit në çdo pjesë të territorit të Republikës së Shqipërisë. Demiraj tha se duhet të vijojë intensifikimi në luftën ndaj fenomenit, sidomos në parandalimin e saj në mbjellje apo kultivim. "Kontrolli i territorit është detyrë që çdo individ me uniformë policore duhet të angazhohet maksimalisht. Çdo tolerim ndaj këtij fenomeni do të penalizohet rreptësisht. I gjithë zinxhiri drejtues i Policisë së Shtetit do të mbajë përgjegjësi sipas përcaktimeve të ligjit", - tha ai. Gjithashtu, ministri i Brendshëm u ndal edhe te forcimi i sigurisë dhe rendit publik gjatë sezonit turistik. Ai kërkoi angazhim maksimal nga Policia e Shtetit për të garantuar rendin dhe qetësinë publike gjatë këtij sezoni veror, dhe një përqendrim të veçantë në drejtim të parandalimit të aksidenteve dhe përmirësimit të qarkullimit rrugor.