Hapet qendra e vizitorëve në Parkun e Dajtit, informacion për turistët
Dita Europiane e Parqeve, Koka: Shtim të hapësirave
Hapet
qendra e re e viz itorëve në Parkun Kombëtar të Dajtit, e cila do të jetë një pikë informacioni dhe shërbimi të kualifikuar për çdo turist vendës dhe huaj. Inaugurimi është bërë nga ministri i Mjedisit, Lefter Koka në Ditën Europiane të Parqeve, i cili inspektoi gjithashtu edhe rikonstruksionin e Shtëpizës së Reinxhërsave në hyrje të Parkut Kombëtar, si dhe investimet në logjistikë për stafin e Agjencisë Kombëtare të Zonave të Mbrojtura të financuara nga "Natura 2000". Sipas Kokës, në thuajse katër vite është treguar një vëmendje në rritje për ruajtjen dhe shtimin e zonave të mbrojtura. "Tashmë kemi mbërritur nivelin e 17% të sipërfaqeve të zonave të mbrojtura në territorin shqiptar të klasifikuara në nivele të ndryshme", - tha Koka, duke shtuar se krijimi i Agjencisë Kombëtare të Zonave të Mbrojtura dhe autonomia financiare që ky institucion do të marrë nga ligji i ri i zonave të mbrojtura të miratuar më 4 maj 2017 në parlamentin shqiptar, është një zhvillim i rëndësishëm. Po ashtu, sipas tij, "nuk mund të vazhdohet me të njëjtën filozofi, ku shumë qytetarë shqiptarë duhet të udhëtojnë qindra mijëra km larg në vende të huaja për të pushuar". "Ne kemi të gjitha mundësitë, të gjitha resurset, kemi njerëz të mrekullueshëm, të cilët mund të ofrojnë shërbime të mrekullueshme qoftë për të pushuar apo për t'u argëtuar dhe aq më shumë për t'i parë fëmijët të lumtur dhe ky është misioni ynë",- përfundoi ministri gjatë fjalës së mbajtur në inaugurimin e qendrës së informacionit në Dajt. Dita Europiane e Parqeve shërben për të promovuar zonat e mbrojtura dhe për të theksuar rëndësinë e mbrojtjes, menaxhimit, por edhe frekuentimit të tyre. Parqet kombëtare janë oaze të natyrës, që ofrojnë për çdo qytetar qetësi, duke lidhur më shumë njerëzit me mjedisin.