Thaçi: BE- ja pasive për Ballkanin, s'ka plan strategjik
Presidenti i Kosovës: Vonesa e politikës europiane për rajonin, e papërgjegjshme "Idenë e Shqipërisë së Madhe e mban gjallë Beogradi"
Bashkimi Europian është pasiv në lidhje me Ballkanin"; kjo është deklarata e Presidentit të Kosovës, Hashim Thaçi, gjatë një interviste për të përditshmen austriake "Salzburger Nachrichten". Thaçi, ditë më parë zhvilloi një vizitë zyrtare në Austri, përgjatë së cilës ka pasur edhe një takim me presidentin austriak Van der Bellen. Këtë takim, por edhe për marrëdhëniet bilaterale ndërmjet dy shteteve, për procesin e integrimeve euroatlantike, liberalizimin e vizave dhe situatën politike në Kosovë, Presidenti i Kosovës i ka komentuar në këtë intervistë. Po kështu Thaçi ka folur edhe për Shqipërinë e Madhe, pas deklaratave të tij dhe Kryeministrit të Shqipërisë Edi Rama. Ai ka deklaruar se ideja e Shqipërisë së Madhe vjen nga Serbia, e cila e ka hedhur si tezë për të mbuluar pretendimet e saj për krijimin e Serbisë së Madhe.
Ishte i suksesshëm takimi me presidentin Van der Bellen?
Ishte një takim i shkëlqyer! Ne diskutuam mbi marrëdhëniet e shkëlqyera në mes të Austrisë dhe Kosovës, nuk ka çështje të hapura mes dy vendeve tona. Ne kemi diskutuar vetëm se si mund të thellojmë edhe më tutje bashkëpunimin e mirë në mes nesh. Austria ishte ndër shtetet e para që e kanë njohur Kosovën, dhe për këtë jemi shumë mirënjohës. Austria është gjithashtu një nga investitorët më të mëdhenj në Kosovë. Unë shfrytëzova rastin për të ftuar investitorë të tjerë. Gjithashtu, kam ftuar edhe presidentin Van Der Bellen për ta vizituar Kosovën.
Asnjë çështje e hapur me Austrinë, por ndoshta me Brukselin. Sot, e mërkurë, Federica Mogherini takon përfaqësuesit e shteteve të Ballkanit Perëndimor. Çfarë prisni ju nga kjo drekë pune?
Ne nuk kemi për të sqaruar ndonjë çështje të pazgjidhur me Brukselin. Ne duam që ta shohim Brukselin më shumë të angazhuar dhe presim që ky takim të jetë një konfirmim i vëmendjes më të madhe të BEsë dhe Shefes së Politikës së Jashtme Mogherini drejt Ballkanit Perëndimor. Takimi është një ide shumë e mirë, por ne nuk mund të presim mrekulli prej tij.
Liberalizimi i vizave është një prioritet i lartë për Kosovën…
Së pari Kosova kishte 94 kushte, të cilat që të gjitha i ka plotësuar. Pastaj, erdhi kushti i 95- të. Kjo nuk është përmbushur ende për shkak të çështjeve të brendshme politike. Unë shpresoj që ne do ta përmbushim sa më shpejt që të jetë e mundur. Por, mbetet e papranueshme që BE- ja ta izolojë Kosovën dhe qytetarët e saj edhe më tej nga Evropa - si të vetmin vend.
Kjo do të mund të krijojë hapësirë për ideologjitë që nuk janë pro- evropiane, paralajmëruat ju në një intervistë me gazetën "Handelsblatt"…
Nuk është vetëm liberalizimi i vizave, por e gjithë vonesa me të cilën BE- ja ka arritur për Kosovën dhe rajonin në përgjithësi. Kjo e ka efektin që në një hapësirë të krijohen ideologji, qofshin ato radikale ose nacionaliste. Por ajo gjithashtu hap hapësirë për ndikimin rus. Vonesa e politikës së BE- së në Ballkan është e papërgjegjshme!
Ju kritikoni BE- në për mungesë vizioni?
Konkretisht mendoj unë, që BE- ja qasjen e saj ndaj Ballkanit Perëndimor nuk e ka strategjike, por më shumë sipas kritereve teknike dhe administrative. Bruk- seli nuk luan rolin e një udhëheqësi, të një motori, por vetëm reagon ndaj zhvillimeve në rajon - si një vëzhgues pasiv.
Cili është vizioni juaj për rajonin? Ideja e Shqipërisë së Madhe për krijimin e një shteti, luan ndonjë rol?
Ideja e Shqipërisë së Madhe vjen nga Beogradi dhe jo nga Kosova, apo nga Shqipëria. Kjo është një dezinformatë e Serbisë, me qëllim të mbulimit të synimeve të tyre për krijimin e Serbisë së Madhe. Ideja e Shqipërisë së Madhe nuk është një ide që erdhi nga shqiptarët. Vetëm Beogradi e mban këtë diskutim të gjallë.
Në pak javë Kosova do të zgjedhë parlamentin e ri. Në çfarë drejtimi po shkon vendi juaj në të ardhmen?
Të gjitha partitë politike janë pro NATO- s dhe pro BEsë. Kosova është vendi më pro- evropian në Ballkanin Perëndimor. Rrjedhimisht nuk do të ketë ndryshim të drejtimit, vetëm një ndryshim të ritmit. Disa do të kenë zgjidhje të shpejta, disa të tjera të ngadalshme. Unë pres zgjedhje të lira, demokratike me pjesëmarrjen e të gjitha grupeve. Ne kemi ftuar vëzhgues të BEsë. Është një test tjetër, por edhe një konfirmim i pjekurisë së demokracisë në Kosovë. Unë mbetem i bindur se ne do të kemi një qeveri stabile, pro- evropiane dhe multietnike, e cila do të jetë në gjendje për të vazhduar reformat.