Junajtid fiton Europa Ligën dhe siguron biletën e Championsit
Anglezët bëhen skuadra e 5- të në kontinent që ka fituar çdo trofe pas Juventusit, Ajaksit, Bajernit dhe Çelsit "Djajtë e kuq" mposhtën Ajaksin 2- 0 në Stokholm
Nuk ka surpriza, Mançester Junajtid fiton finalen e Europa Ligue, duke siguruar trofeun e parë europian të kësaj kategorie. "Djajtë e Kuq" thyen me lehtësi Ajaksin në ndeshjen e Stokholmit, me rezultatin 2- 0. Skuadra e Zhoze Murinjos e interpretoi me mjeshtëri këtë 90minutësh, duke nxjerrë në pah limitet e holandezëve me një grup shumë të ri lojtarësh pa eksperiencë në evenimente të tilla. "Friends Arena" priti në një mbrëmje të paharrueshme dy prej skuadrave më të titulluara të kontinentit, ku që në minutat e para Mançester Junajitid mori kontrollin duke treguar muskujt, por me kalimin e minutave edhe "harkëtarët" kërkuan të jepnin sinjale jete. Gjithsesi, ishte mister 100- milionëshi Pol Pogba, që zhbllokoi sfidën me një goditje jo të pakapshme, por të fuqishme. Anglezët në festë, Ajaksi i shokuar. Pogba tregoi se në të tilla ndeshje klasi, por edhe milionat e shpenzuara nga Mançester Junajtid arrijnë të bëjnë diferencën. Ajaksi tentoi të çante në qendër të mbrojtjes Junajtidin, por pa ia dalë mbanë, pavarësisht dëshirës që në të tilla raste nuk është e mjaftueshme. Me rikthimin e skuadrave në fushën e lojës, një tjetër blerje e verës, Henrikh Mkhitarjsn shteroi shpresat e bardhekuqve për të mbajtur të haur sfidën. Një goditje e rëndë për skuadrën e Peter Bosz, ku Dolberg, Jounes dhe Traore, lojtarë që ndiqen nga gjysma e klubeve të mëdha europiane, nuk arritën të nxirrnin në vitrinë vetitë e tyre më të mira. Me kalimin e minutave, skuadra e Zhoze Murinjos menaxhoi në mënyrë perfekte rezultatin dhe tentoi madje të shënonte edhe golin e tretë me Rashford të vetëm në sulm, por edhe kaq mjaftoi që Mançester Junajtid të shpëtojë një sezon gati- gati të dështuar. Me trofeun e parë të Europa League në muze dhe të dytin për Zhoze Murinjon në aventurën e tij të re me "Djajtë e Kuq", për skuadrën më të lavdishme të Anglisë hapet një kapitull i ri.