Sulm terrorist në Athinë, Papademos i shpëton atentatit
Ish- kryeministri grek mori një zarf- bombë që i shpërtheu në duar, plagoset edhe shoferi Pas operacionit, është jashtë rrezikut për jetën
Ish- kryeministri grek, Lu kas Papademos është pla gosur rëndë, pasi ka hapur një pako- bombë brenda automjetit me të cilin udhëtonte. Sipas informacioneve, në makinë ndodheshin edhe dy persona të tjerë, prej të cilëve njëri është plagosur. Ngjarja ka ndodhur në Athinë, ndërsa siç raporton "BBC", Papademos dhe shoferi i tij nuk janë në gjendje rreziku për jetën. Mediat greke raportuan se Papademos, ka qenë në automjetin e tij pasi ka marrë një zarf, brenda të cilit kishte bombë, dhe pasi e ka kuptuar se çfarë përmbajtjeje ka brenda, e ka hedhur atë në dysheme. Më pas bomba ka shpërthyer, duke e plagosur atë në fytyrë, duart, bark dhe këmbë, ndërsa bashkë me shoferin, edhe ai i lënduar, u transportuan me urgjencë në spital. Ish- kryeministri, 70 vjeç, i është nënshtruar një operacioni kirurgjikal, ndërsa thuhet se është jashtë rrezikut për jetën. Mediat greke e kanë cilësuar ngjarjen si një akt terrorist. Megjithatë, ende nuk dihet se çfarë lloj pajisjeje është përdorur për të kryer këtë shpërthim. Lucas Papademos është emëruar kryeministër në nëntor të vitit 2011, mes trazirave ekonomike dhe politike, duke shërbyer në këtë post deri në maj të vitit 2012. Ekonomisti udhëhoqi Greqinë jashtë krizës së vështirë financiare të atyre viteve. Ai ishte kryeministër i qeverisë teknike në 2011- 2012, ose qeverisë së unitetit kombëtar, ndërsa mbahet mend për shtrëngimin e masave financiare me qëllim marrjen e këstit të radhës nga FMN- ja. Ai ka qenë gjithashtu zëvendëspresident i BQE. Pas negociatave të gjata, kryeministri që po largohej, George Papandreu dhe udhëheqësi i opozitës së Demokracisë së Re, Antonis Samaras, arritën një marrëveshje për emrin e shefit të ri të qeverisë, i cili duhej të bindte Bashkimin Europian dhe Fondin Monetar Ndërkombëtar të jepnin 8 miliardë euro ndihmë të nevojshme për vendin brenda 15 dhjetorit, për të paguar faturat dhe për të shmangur falimentimin në minutën e fundit. Me një përvojë mjaft solide si një profesor universiteti, por edhe në financë ndërkombëtare, Lucas Papademos, atëherë 64 vjeç, ish- zëvendëspresident i Bankës Qendrore Europiane ( BQE), është një personalitet mjaft i shquar dhe i respektuar në Greqi e jashtë saj. I lindur në Athinë në vitin 1947, pasi u diplomua në kryeqytetin grek, Papademos studioi në SHBA, ku u diplomua në Institutin e Teknologjisë në Massachusetts ( MIT), më parë në Fizikë e më pas mori doktoraturën në Inxhinieri Elektronike në vitin 1972 dhe një në Ekonomi në vitin 1978. Ndërsa studionte, ka punuar si kërkues në MIT. Karriera e tij akademike fillon pranë Departamentit të Ekonomisë në Universitetin e Kolumbisë në NjuJork, ku gjatë periudhës 1975- 1984 shërbeu si asistent dhe më pas si profesor.
Më 20 mars, 8 pako me bomba u zbuluan në një zyrë postare në Athinë. Mediat ndërkombëtare raportuan atëherë se objektivi ishin disa zyrtarë të BE- së, që punojnë në sektorin e biznesit dhe financave. Megjithatë, subjektet e tyre reale nuk arritën të verifikoheshin nga autoritetet përkatëse.