3 kandidatë largohen nga lista, KQZ, 24 orë afat PD- së t'i plotësojë
Debate në mbledhjen e komisionit, opozita depozitoi 94 emra nga 140 Tërhiqen Ramiz Çobaj, Sazan Guri e Blendi Himçi
Komisioni Qendror i Zgjedhjeve vendosi dje t'i japë 24 orë afat PD- së për të plotësuar listën e saj të kandidatëve për deputetë për zgjedhjet e 25 qershorit. Gjatë debateve, përfaqësuesi i PS, Eridjan Salianji kërkoi miratimin e emrave të opozitës siç janë paraqitur, ku 94 kandidatë ishin sipas kritereve. Pikë kjo e mbështetur edhe nga Denar Biba dhe anëtarët e majtë të KQZ. Kryetari i KQZ, Klemend Zguri ka kërkuar që vendimet në administrimin e procesit të mos merren me forcën e kartonit, por në frymë të Kodit Zgjedhor. Ndërsa theksoi se nëse veprohet me këtë forcë, ai do të dorëhiqet nga detyra. "PD me vetëdije ka sjellë 94 kandidatë, edhe pse mund të sjellë më shumë, e ka sjellë me vetëdije listën, e di që ka pabarazi gjinore", u shpreh anëtari Biba. Por, sipas kryetarit, Klement Zguri, "lista ose është e rregullt, ose nuk është dhe të plotësohet. A ka të drejtë të ndryshohet lista?", i është drejtuar Zguri, Bibës. "Sipas Kushtetutës së Republikës së Shqipërisë, lista nuk ndryshohet, të miratojmë listën dhe të mblidhemi në orën 22: 00 për fletën e votimit", u shpreh ishkryetari. "Subjektet kanë të drejtën të korrigjojnë parregullsitë e tyre", u shpreh kryetari. "Propozoj që PD- së t'i lëmë 24 orë kohë afat për të plotësuar mungesat në dokumentacion dhe për të bërë korrigjimet e nevojshme", sugjeroi Gëzim Veleshnja, anëtar i KQZ- së. KQZ pas debateve vendosi që të shtyjë afatin për PD. PD s'e dorëzoi të plotë listën, dërgoi 95 nga 140 kandidatë.
TËRHEQJA E KANDIDATËVE
Ndërkohë, 3 kandidatë të opozitës, Ramiz Çobaj, Sazan Guri dhe Bledi Himçi kanë vendosur zyrtarisht të mos jenë pjesë e listave si kandidatë për deputetë për zgjedhjet e 25 qershorit, konkretisht në qarqet Shkodër, Berat dhe Elbasan. Ramiz Çobaj ishte vendosur i teti në listën e kandidatëve për qarkun e Shkodrës. Ai u shpreh dje se nuk është pyetur për kandidimin. Ramiz Çobaj njëkohësisht është dhe kryetar i degës së PD- së së Shkodrës. "Nuk kam qenë kurrë në garë për deputet. Nuk u pyeta, as m'u mor mendim, as për futjen time në garë, por nuk kam pasur diskutime apo konsultime edhe sa i përket përpilimit të listave për Shkodrën. Refuzova të plotësoja formularin për të garuar, pasi mësova që isha futur në listë dhe renditesha i teti", - deklaroi Çobaj. I pakënaqur nga renditja e tij i 5 në listën e PD për qarkun e Beratit është shprehur edhe Sazan Guri, i cili tha se del nga gara, pasi nuk sheh respekt të klasës politike ndaj asaj akademike. Blendi Himçi, sekretar i përgjithshëm i degës së PD në Elbasan, zhgënjimin e tij nuk e lidh me renditjen si i teti në listën e qarkut të Elbasanit, por me mospërfshirjen në të, të kandidatëve që kanë kontribuar ndër vite për PD apo përfshirjen e kandidatëve që nuk asnjë lidhje me qarkun e Elbasanit.