Drogë në Korfuz, policia greke zbulon dy ngarkesa në det
Sekuestrohen 56 kg marijuanë, ishte braktisur
Një
operacion antidrogë i policisë greke ka përfund uar me sekuestrimin e rreth 56 kilogramëve marijuanë. Mediat e vendit fqinj raportojnë se lënda narkotike është gjetur nga efektivët në ujërat detare të Korfuzit, ndërsa nuk dihet asgjë për prejardhjen e saj. Sipas policisë greke, gjatë një kontrolli në det është evidentuar një ngarkesë droge në Erikusa. Fillimisht efektivët kanë parë 1 pako të madhe që pluskonte në det, e cila përmbante 4 pako më të vogla me rreth 40 kg e 250 gramë marijuanë. Në vijimësi nga kontrollet është zbuluar edhe një ngarkesë e dytë, e cila ishte në zonën detare të quajtur "Kulura". Në këtë rast, policia ka evidentuar 2 pako të mëdha që përmbanin nga 5 pako më të vogla secila, në total 16 kg e 900 gramë marijuanë. Edhe në këtë rast, mediat greke nuk referojnë asnjë të dhënë nëse ka dyshime që droga ishte nisur nga Shqipëria, apo nga territori grek, e gjithashtu asnjë të dhënë për destinacionin e drogës. Pavarësisht sekuestrove, nga ky operacion nuk ka pasur të arrestuar, të paktën deri tani. Lënda narkotike thuhet se është braktisur, me gjasa nga persona që nuk kanë arritur ta realizonin misionin deri në fund, apo që mund edhe të kenë nuhatur kontrollin e policisë. Megjithatë, kjo sasi droge mendohet se nuk është e vetmja që lundron në ujërat e Korfuzit. Autoritetet kanë vendosur të vijojnë operacionin për zbulime të mëtejshme të mundshme. Nga ana tjetër, efektivë të Antidrogës janë duke hetuar për identifikimin, gjetjen dhe arrestimin e trafikantëve, për origjinën e të cilëve deri tani nuk ka të dhëna.