Çfarë mendoj për presidentin Trump
' Deutsche Welle'
Për Angela Merkelin dhe kolegët e saj, takimi në Taormina ishte një provë e durimit. Si pjesëmarrësja, e cila ka kohën më të gjatë në post, i ra për detyrë kancelares që t'i vërë frerin demit Trump, ndërsa ai rapëllinte në dyqanin e porcelaneve të politikës ndërkombëtare. Ajo e bëri me durimin e pafund të një mësuesje filloreje, që i përulet një fëmije trazavaë dhe të paaftë për të mësuar. Presidenti i SHBA- ve, psh. nuk do të pranojë që ndryshimi i klimës është një kërcënim serioz dhe që marrëveshja e Parisit është një domosdoshmëri. Të gjashta vendet e tjera të grupit të shteteve i sqaruan në detaje Trumpit. Më pas këshilltari i tij lëvdoi duke thënë se presidenti ka mësuar shumë. Është turp që samiti i vendeve më të rëndësishme të industrializuara të konsiderohet si një kurs patronazhi për një manjat imobiliesh, që nuk e ka idenë dhe nuk ka aspak interes. Por ky rast është vetëm një ndër shumë të tjerë, nëse vëren sjelljen e Trumpit me partnerët e tij ndërkombëtarë. Për fat të keq ai është krahas kësaj, edhe presidenti i SHBA- ve dhe për këtë arsye duhet që të ruash nervat.
G7 U SHPËTUA, TANI PËR TANI...
Një fjalë e urtë popullore thotë, që budallallëku fiton. E kjo duket se po del e vërtetë, nisur nga turi me harbutllëk, egocentrizëm dhe me agresivitet i Trumpit në Europë si një Bully- inChief. Ky njeri është një sfidë për të rriturit rreth tij. Por ata ia dolën dhe klubi G7 tani për tani deri në takimin e radhës u shpëtua. Diplomatët e dinë se sa të rëndësishme janë të tilla "formate", takime rituale dhe të rregullta, në atmosfera shkëlqimi dhe me imazhe të bukura. Takimet janë një ' showbiz' politik dhe megjithatë, ato u imponojnë kryeministrave edhe disiplinë. Gjithmonë nga e para anëtarëve u duhet të theksojnë të përbashkëtat e grupit ose në fund të vendosin që të largohen prej tij. Nisur nga një pasojë e tillë është trembur madje edhe presidenti kokëfortë i SHBA- ve. Ndokush duhet t'i ketë shfrytëzuar momentet e shkurtra të vëmendjes së Trumpit dhe duhet t'ia ketë bërë të qartë atij, se "Amerika first" mund të çojë në izolimin e "Amerika alone". Dhe se do të ishte e nxituar ta shpërbënte këtë aleancë të shteteve perëndimore prej humorit të keq dhe mos interesimit.
KONSENSUS MINIMAL NË VEND TË PËRPARIMEVE
Është shkruar mjaft për tiparet sociopatike të karakterit të Trumpit, mungesën e intelektit, të edukatës, dijes, e sjelljes apo dhe gjithçkaje tjetër që përbën njeriun. Paraqitjet e tij në BE në Bruksel, në NATO dhe në samitin e G7 vetëm sa kanë konfirmuar, atë që ne e dinim prej kohësh për këtë njeri. Presidenti i SHBA- ve ngatërron emigracionin me terrorizmin, e konsideron mbrojtjen e klimës si një komplot, e dëmton aleancën mbrojtëse NATO dhe nënçmon kryeministrat e vendeve të tjera. Ai u bë pengesë që takimi të mund të arrinte rezultate thelbësore e madje edhe përparime. Të krijohet përshtypja, sikur dikush argëtohet, duke i tërhequr prej hunde partnerët e G7. Në SHBA thuhet me një vrazhdësi të bukur: "Më mirë kundërshtarin mbaje në çadër që të urinojë jashtë, se sa ta lesh jashtë dhe të të ndosë që andej folenë". Lajmi i keq është që Donald Trump urinon edhe brenda çadrës. Kjo ka erë të keqe, por ne duhet ta durojmë atë. Për aq kohë, derisa zgjedhësit apo sistemi politik në SHBA të na shpëtojnë prej këtij presidenti. Ne po presim kohë më të mira dhe deri atëherë po përpiqemi të qëndrojmë sa më mirë të jetë e mundur të bashkuar.