Vetingu, nis dëgjimi i kandidatëve, 17 rekomandime negative nga ONM

Deri më 24 qershor duhen ngritur institucionet

Komisioni

' ad hoc' për verifikimin e kandidatëve për institucionet e vetingut nisën dje seancat dëgjimore me kandidatët që ishin skualifikuar nga lista prej 193 emrash. Ndërkohë sot, seanca do të vijojë me pjesën e kandidatëve që janë kualifikuar nga ONM. Lista e tyre do t'u përcillet më pas dy komisioneve të tjera ' ad- hoc', të cilat do të bëjnë përzgjedhjen. I gjithë procesi i ngritjes së institucioneve të vetingut, i parashikuar në Kushtetutë, duhet të përfundojë brenda datës 24 qershor. Nga lista A, 64 kandidatë kanë përmbushur kriteret ligjore, ndërsa ONM për 17 prej tyre ka vendosur rekomandime negative, pasi edhe pse ligjërisht janë në rregull, 8 nuk justifikojnë pasurinë, njëri me mbiemrin Gjika, ndërsa 9 kanë lidhje nepotike. Deputeti i PD, Bylykbashi u shpreh se kandidatët duhet që të njihen me arsyet pse ONM nuk i ka kualifikuar. "Në vend të operacionit ndërkombëtar të monitorimit na ka ardhur një shkresë pa përgjigje nga delegacioni i BE në Tiranë. Kandidatët duhet të njihen me arsyet pse ONM nuk i ka kualifikuar". Një ndër kandidatët që nuk përmbush kriteret dhe që është përjashtuar nga ONM është Krenar Ahmeti, pasi sipas raportit, ka përvojë të pamjaftueshme dhe sjellje të mëparshme kriminale. Por Ahmeti u shpreh në komisionin ' ad hoc' në Kryesinë e Kuvendit se: "Jam dënuar me gjobë nga Gjykata e Apelit të Tiranës. Por sipas ligjit jam i rehabilituar". Komisionet e vetingut do të përzgjedhin 27 kandidatë, të cilët do të votohen në një seancë parlamentare të veçantë.