Sherr për një femër, dy gjimnazistë përfundojnë të plagosur në spital
Konflikti mes tre nxënësve të shkollës së mesme profesionale nisi të premten U goditën me thikë, arrestohet 19- vjeçari Fejzollari
Sherri për një femër për pak sa nuk u ka kush tuar jetën dy gjimnazistëve në qytetin e Korçës. Xhemi Maksuti dhe Mikel Rënxa, përkatësisht 19 dhe 17 vjeç janë goditur me thikë nga dy 17- vjeçari Marjo Fejzollari dhe për pasojë janë plagosur rëndë. Ata kanë përfunduar në spitalin rajonal të qytetit juglindor, ndërsa policia ka bërë të mundur identifikimin dhe vënien në pranga të autorit të krimit, i cili akuzohet për veprat penale: "Vrasje me dashje mbetur në tentativë" si dhe "Mbajtje pa leje e armëve të ftohta". Burime zyrtare nga Drejtoria e Policisë së Qarkut të Korçës bënë me dije se sherri mes tre nxënësve të shkollës profesionale "Irakli Tërova" ka nisur që të premten, ndërsa paraditen e djeshme ka degjeneruar në përleshje me thika.
NGJARJA
Katër ditë më parë, tre gjimnazistë, banues në qytetin e Korçës janë grindur me njëri- tjetrin për një vajzë. Sherri mes tyre ka vijuar përgjatë tri ditëve të fundjavës, ndërsa paraditen e djeshme ka përfunduar me plagosjen e dy prej tyre dhe arrestimin e agresorit. Burime pranë grupit hetimor pohuan se adoleshentët Maksuti dhe Rënxa janë konfliktuar në afërsi të shkollës së mesme profesionale me Fejzollarin. Pas debateve të ashpra dhe sharjeve të ndërsjella, të rinjtë janë përleshur fizikisht. Mësohet se në sherr e sipër, Marjo Fejzollari ka nxjerrë thikën që mbante me vete dhe ka plagosur dy nxënësit e shkollës. Pas sinjalizimit për konfliktin mes gjimnazistëve, policia ka shkuar në vendngjarje dhe ka nisur hetimet. Ndërsa, dy të plagosurit janë dërguar në spitalin e Korçës ku iu është dhënë ndihma e parë mjekësore. Sipas bluzave të bardha të këtij qyteti, 19vjeçari Xhemi Maksuti ka marrë plagë të rënda ndaj është dërguar për mjekim më të specializuar në Tiranë. Ndërkaq, burimet e mësipërme sqaruan për "Gazeta Shqiptare" se pas krimit, Marjo Fejzollari është larguar nga vendi i ngjarjes, por blutë kanë bërë të mundur identifikimin dhe kapjen e tij. Gjithashtu, pas ngjarjes janë shoqëruar dhe dy nxënës të shkollës në fjalë dhe pas marrjes në pyetje ata janë lënë të lirë. Policia e Korçës po punon intensivisht për zbardhjen e plotë të kësaj ngjarjeje, ndërsa materialet procedurale pritet t'i kalojnë prokurorisë së këtij rrethi për veprime të mëtejshme.