Zaev vendos ministrat, nesër miratohet qeveria

Asnjë emër surprizë, 17 deputetët do të hetohen paraprakisht Ministrat shqiptarë, pa kompetenca

Qeveria e re e Zoran Zaev nuk do të ketë asnjë surprizë. Kryeministri i ardhshëm i Maqedonisë ka përcaktuar tashmë kabinetin qeverisës dhe emrat e deputetëve që do ta përbëjnë atë. Ashtu siç pritej, lideri i LSDM- së ka vendosur për emrat që përfliten prej javësh, jo vetëm për ministrat që do të drejtojnë institucionet e caktuara, por edhe ata pa portofol, me kompetenca të reduktuara. Në listën e emrave të publikuar nga Zaev, si befasi mund të llogaritet nominimi i Goran Sugarevskit, ish- koordinator i Grupit Parlamentar të LSDM- së për ministër të Transportit dhe Lidhjeve, dhe nominimi i Robert Popovskit, këshilltar për media, për ministër pa portofol. Kandidatët e tjerë ishin të prit- shëm dhe vijnë nga rrethi i ngushtë i Zaevit. Në listën e 17 emrave përfshihen edhe ministrat pa portofol që vijnë nga partnerët e koalicionit të LSDM- së. Kreu i LSDM- së ka njoftuar se do të bëhet përpjekje që sa më shpejt të jetë e mundur të përgatiten dokumentet e nevojshme dhe të dorëzohen në parlament. Kjo nënkupton se zgjedhja e qeverisë së re do të mund të ndodhë nesër ( të mërkurën). Kreu i LSDM- së, Zoran Zaev, nga Këshilli Qendror i partisë ka kërkuar mbështetje për Oliver Soasovski, si ministër i Brendshëm, Radmilla Sheqerinska, ministre e Mbrojtjes, Nikolla Dimitrov, si ministër i Jashtëm, Dragan Tevdovski, në drejtim të Ministrisë së Financave, Renata Deskoska, ministre e Arsimit, Goran Sugarevski, ministër për Transport dhe Lidhje, Ljupço Nikollovski, ministër i Bujqësisë, Milla Carova, ministre për Punë dhe Politikë Sociale, Damjan Mançevski, ministër i Shoqërisë Informatike, Robert Allagjozovskji, ministër i Kulturës, Edmond Ademi, ministër pa portofol dhe Koço Angjushev, ministër pa portofol. Natyrisht, pritet që të gjithë emrat të miratohen, edhe pse përflitet se dy prej tyre nuk do të arrijnë të kalojnë kontrollin e Prokurorisë Speciale. Me synim transparencën dhe pastërtinë e figurës së pjesëmarrësve në qeveri, Zaev i ka dërguar dosjet e të gjithë ministrave në prokurori për të sqaruar nëse ata kanë pasur a jo ndonjëherë të bëjnë me korrupsion dhe akte kriminale. Deri tani nga institucioni i akuzës nuk ka asnjë përgjigje, megjithatë pritet që ajo të vijë gjatë ditës së sotme, kështu mund të procedohet me formimin e qeverisë. Partia e Kryeministrit të ri të Maqedonisë, LSDM- ja, do të qeverisë në aleancë me partitë shqiptare, të cilat kanë marrë disa nga postet kyçe. Megjithatë, e "përjashtuara" mes shqiptarëve është Lëvizja Besa, e cila ka vendosur të qëndrojë jashtë koalicionit të ri qeveritar. Me këtë, shumica e re parlamentare do të ketë 62 vota në parlament, të mjaftueshme për miratimin e kabinetit qeverisës të Zoran Zaev. Lidhja Social Demokrate e Maqedonisë njoftoi përmes një komunikate se "mbeten dyert të hapura për bashkëpunim rreth reformave që e presin vendin dhe për gjithçka tjetër që paraqet interes për Republikën e Maqedonisë". Ndërkohë, Aleanca për Shqiptarët pritet ta bëjë zyrtar qëndrimin për pjesëmarrje në qeveri dhe do të drejtojë Ministrinë e Shëndetësisë, sipas burimeve nga të gjitha partitë e shumicës. Bashkimi Demokratik për Integrim ka vendosur për emrat e ministrave të rinj nga radhët e veta. Ata do të jenë; Hazbi Lika, për zëvendëskryeministër i ngarkuar për sistemin politik dhe marrëdhënie midis komuniteteve, Bujar Osmani për zëvendëskryeministër për Integrimet në Bashkimin Evropian, Bylent Saliu për ministër i Drejtësisë, Kushtrim Bekteshi për ministër i Ekonomisë, Sadulla Duraku për ministër i Ambientit dhe Ramiz Merko për ministër pa portofol.