Sekuestrohen 52.000 m2 tokë në zonën bregdetare të Zvërnecit
"Pasuria me vlerë 2 mln euro u regjistrua në Hipotekë 4 vite më parë" Prokuroria: Dy parcelat u përfituan me dokumente false
Gjykata e Rrethit të Vlorës, me kërkesë të Prokurorisë ka vendosur nën sekuestro dy parcela tokë me sipërfaqe totale 52.000 m2 në zonën e Zvërnecit me vlerë rreth 2 milionë euro, pasi dyshohet se janë përfituar në bazë të dokumentacionit të falsifikuar. Mësohet se nga hetimi është provuar se pasuria e mësipërme është regjistruar më datë 21.03.2013, pranë Zyrës Vendore të Regjistrimit të Pasurive të Paluajtshme Vlorë. Sipas organit të akuzës, regjistrimi i kësaj pasurie është kryer mbi bazën e dokumenteve të falsifikuara, ndërsa pas regjistrimit janë kryer veprime juridike mbi këtë pasuri dhe konkretisht ndarje, shitje dhe dhurime, me qëllim fshehjen e paligjshme të origjinës së kësaj pasurie.
HETIMET
Prokuroria e Vlorës ka nisur kryesisht hetimin për këtë rast, në bazë të të cilit, deri në këtë fazë ka rezultuar se: Dosja gjyqësore që i përket vendimit civil nr. 3805, datë 23.12.1996 të Gjykatës së Rrethit Gjyqësor Vlorë, si dhe dosja gjyqësore që i përket vendimit civil nr. 147, datë 24.12.1997 të Gjykatës së Rrethit Gjyqësor Vlorë, janë falsifikuar dhe futur në kundërshtim me ligjin në arkivën e Gjykatës së Rrethit Gjyqësor Vlorë.
Ky fakt është provuar nga akti i ekspertimit teknikografik. Rezulton e provuar se përmes vendimit civil nr. 3805, datë 23.12.1996 të Gjykatës së Rrethit Gjyqësor Vlorë, i cili është tërësisht i falsifikuar, është pasqyruar fakti sikur i janë kthyer në natyrë shtetases Shqiponjë Eminaj ( Kamberaj) dy parcela të lira, njëra 30.000 m2 dhe parcela e dytë me sipërfaqe 22.000 m2, pronë e cila ndodhet në bregdet në zonën e Zvërnecit, Vlorë.
Rezulton e provuar se edhe vendimi civil nr. 147, datë 24.12.1997 i Gjykatës së Rrethit Gjyqësor Vlorë është tërësisht i falsifikuar, ku përmes së cilit është pasqyruar fakti i rremë, sipas të cilit është lëshuar urdhri i ekzekutimit për vendimin nr. 3805, datë 23.12.1996 të Gjykatës së Rrethit Gjyqësor Vlorë.
Nga hetimi është provuar se pasuria e mësipërme me sipërfaqe 52.000 m2 është regjistruar më datë 21.03.2013, pranë Zyrës Vendore të Regjistrimit të Pasurive të Paluajtshme Vlorë.
Regjistrimi i kësaj pasur- ie është kryer mbi bazën e dokumenteve të falsifikuara, e konkretisht dy dosjeve të mësipërme gjyqësore.
Pas regjistrimit të kësaj pasurie, e cila kap vlerën e mbi 2 milionë euro, janë kryer veprime juridike mbi këtë pasuri, e konkretisht ndarje, shitje dhe dhurime, me qëllim fshehjen e paligjshme të origjinës së kësaj pasurie.
Mbi bazën e kërkesës së prokurorit, Gjykata e Rrethit Gjyqësor Vlorë ka vendosur
caktimin e masës së sigurimit pasuror "sekuestro preventive", për pasuritë e paluajtshme me sipërfaqe 52.000 m2.